"Sabah" millinin üzvünü əvəzedici komandaya göndərib?

"Sabah" futbolçusu Anatoli Nuriyevi əvəzedici heyətlə meydana çıxıb. Vaxtilə milliləşdirilərək Azərbaycan yığmasına cəlb olunan 28 yaşlı ukraynaəsilli yarımmüdafiəçi "Sabah-2"də forma geyinib. O, Əvəzedicilər Liqasının XXII turunda "Turan Tovuz-2" ilə görüşün start heyətində yer alıb.

Məsələ ilə bağlı Oxu.Az-ın sorğusunu cavablandıran "Sabah" klubunun mətbuat katibi Elnur Həmidov futbolçunun oyun praktikasını itirməməsi üçün bu addımın atıldığını deyib:

"Anatoli Nuriyev əsas komandamızın üzvüdür və əsas komanda ilə məşq edir. Premyer Liqada son oyunumuzda Nuriyevin adı iştirak ərizəsində yer almışdı. Əsas komandada az şans qazanan futbolçuların oyun praktikasını itirməməsi üçün əvəzedici komandanın heyətində çıxış etməsi adi praktikadır. Mövsüm ərzində əsas komandamızın başqa futbolçuları da əvəzedici komandanın heyətində meydana çıxıblar".

Qeyd edək ki, Anatoli Nuriyev "Turan Tovuz-2" ilə görüşün 59-cu dəqiqəsində əvəzlənib.

Anar Həsənov