2026-cı il dünya çempionatı ilə erkən vidalaşan Seneqal millisində qalmaqal yaşanıb.
Oxu.Az xəbər verir ki, Seneqal Futbol Federasiyasının rəhbəri Abdullah Fall təşkil etdiyi mətbuat konfransında sensasiyalı açıqlama ilə çıxış edib.
O iddia edib ki, son 10 il ərzində yığmanın əsas həkimi kimi fəaliyyət göstərən Əbdürrəhman Fədior əslində peşəkar idman həkimi yox, mama-ginekologiya üzrə mütəxəssis olub.
"Daimi həkimimizin komandanı müşayiət etməsi üçün lazımi akademik təhsili olmayıb. Mən bunu çox gec anladım, çünki doktor Fədior ixtisasca ginekoloq imiş. Mənə çatan məlumatlara görə, futbolçularımız onun tibbi xidmətlərindən yararlanarkən özlərini heç də rahat və güvəndə hiss etməyiblər. Oyunçularımızda arxayınlıq yaratmaq məqsədilə tanınmış mütəxəssisləri cəlb etməliydik. İnsan sağlamlığı bütün məsələlərdən üstündür", - deyə federasiya prezidenti vurğulayıb.
Bu, səs-küylü ittihamlara qarşı tərəfin cavabı isə gecikməyib. Yığmanın həkimi Əbdürrəhman Fədior prezidentin iddialarını qətiyyətlə təkzib edərək onları böhtan adlandırıb:
"Bu bəyanat məndə böyük qəzəb doğurdu. Federasiya prezidentinin belə yalanlar uydurması məni şoka saldı. Bir insan səsləndirdiyi fikirlərdən əmin deyilsə, ilk növbədə faktları araşdırmalıdır. Mən hələ 2008-ci ildə idman təbabəti üzrə mütəxəssis diplomuna yiyələnmişəm. Futbol yığmasına təyin olunana qədər müxtəlif idman qurumlarında ciddi vəzifələr icra etmişəm. Həm Velosiped İdmanı Federasiyasının tibbi komissiyasının rəhbəri, həm də Həndbol Federasiyasının tibbi komissiyasının baş həkimi vəzifələrində çalışmışam".
Xatırladaq ki, Seneqal yığması DÇ-2026-nın 1/16 final mərhələsi çərçivəsində Belçika seçməsi ilə qarşılaşıb və əlavə vaxtda 2:3 hesablı məğlubiyyətlə turnirlə vidalaşıb.
