"Real Madrid"in hücumçusu Vinisius Junior İspaniya çempionatının "Vilyarreal"la oyunundan sonra sosial şəbəkə hesabında paylaşım edib.
Oxu.Az xəbər verir ki, braziliyalı futbolçu sevincin davam etdiyini bildirib və komandası ilə azarkeşlərindən üzr istəyib.
"Sevinc davam edir. Komandamdan və azarkeşlərimizdən üzr istəyirəm", - deyə Vinisius paylaşımında qeyd edib.
Xatırladaq ki, La Liqanın VIII turu çərçivəsində Madriddə keçirilən qarşılaşma "Real Madrid"in 1:0 hesablı qələbəsi ilə başa çatıb.
Görüşün 72-ci dəqiqəsində Vinisius qırmızı vərəqə alaraq meydandan qovulub. Braziliyalı hücumçu qol vursa da, hakim onun rəqib komandanın yarımmüdafiəçisi Natan Salibanın saçından tutduğunu əsas gətirərək qolu qeydə almayıb və futbolçunu meydandan kənarlaşdırıb.
Qeyd edək ki, bu qələbədən sonra xallarının sayını 18-ə çatdıran "Real Madrid" turnir cədvəlinin üçüncü pilləsində qərarlaşıb.
