"Böyük Dəbilqə" turnirlərinin üçqat çempionu, dünyanın bir nömrəli tennisçisi Yannik Sinner antidopinq qaydalarını pozduğuna görə aldığı üçaylıq diskvalifikasiya müddətində Monte-Karlodakı tennis klubunda məşq edə bilməyəcək.
Oxu.Az xəbər verir ki, bəzi İtaliya nəşrləri Sinnerin belə planlarının olduğunu açıqlamışdı.
"Monte-Karlo klubunun iki tennis federasiyasına üzvlüyü var: Fransa və Monako. Bu, şəxsi klub olsa da, bu, onu öhdəliklərdən azad etmir", - "Tennis Italiano"ya müsahibə verən klubun mətbuat xidmətinin nümayəndəsi bildirib.
Qeyd edək ki, ITIA-nın diskvalifikasiya qaydalarına görə, qadağan olunmuş oyunçu diskvalifikasiya dövründə milli tennis federasiyalarına bağlı klublarda məşq edə bilməz.
Xatırladaq ki, Sinnerin diskvalifikasiya müddəti mayın 4-də başa çatacaq, lakin o, aprelin 13-də rəsmi məşqlərə başlaya biləcək.
