53 milyon manatlıq audit: Təhsil layihələrində əsassız vəsait istifadəsi halları aşkarlanıb

Elm və Təhsil Nazirliyi və onun tabeliyində olan Təsərrüfathesablı Əsaslı Tikinti və Təchizat İdarəsində aparılmış audit nəticəsində əsassız vəsait istifadəsi halları aşkarlanıb.

Oxu.Az "Report"a istinadən xəbər verir ki, bu barədə Hesablama Palatasının 2025-ci ilin I rübünə dair "Dövlət auditi" bülletenində məlumat verilir.

Sənədə əsasən, audit 10 tikinti obyektini əhatə edib və bu obyektlər üzrə ümumilikdə 53.5 milyon manat məbləğində dövlət investisiyalarının istifadəsi araşdırılıb.

Yoxlama zamanı müəyyən olunub ki, layihələrin texniki-iqtisadi əsaslandırmaları olmadan planlaşdırılması nəticəsində dövlət vəsaitindən səmərəli istifadə təmin edilməyib. Ayrı-ayrı obyektlər üzrə layihə-smeta sənədlərində nəzərdə tutulmayan işlər yerinə yetirilib ki, bu da müvafiq olaraq 92 086 manat, 633 723 manat, 560 330 manat və 784 318 manat əlavə vəsaitin xərclənməsinə səbəb olub.

Bundan əlavə, bəzi müqavilə və aktlarda göstərilən işlərin ya faktiki olaraq icra edilmədiyi, ya da həcminin süni şəkildə şişirdildiyi aşkarlanıb. Satınalmalar zamanı qanunvericiliyin tələbləri pozulub, bəzi hallarda isə tenderlər obyektin ehtimal dəyəri müəyyən olunmadan keçirilib.

Beş tikinti obyekti istifadəyə verilsə də, balans uçotuna daxil edilməyib ki, bu da 30,6 milyon manat məbləğində dövlət əmlakının hesabatlılığında şəffaflığa xələl gətirib.

Bundan başqa, quraşdırılan avadanlıqların sənədləşdirilməsi və smeta bölmələrinin ekspertizadan keçirilməsi qaydalarının pozulduğu da müəyyən edilib.