Avropa ABŞ rüsumlarına cavab hazırlayır: "Nəticələr dünyanın bütün ölkələri üçün fəlakətli olacaq"

Avropa Komissiyasının (AK) sədri Ursula fon der Lyayen ABŞ-nin tətbiq etdiyi yeni ticarət rüsumlarına qarşı konkret cavab tədbirləri elan etməsə də, ABŞ Prezidenti Donald Trampı onların ləğvi barədə danışıqlar aparmağa çağırıb. Lakin o, belə məsləhətləşmələrin uğursuzluqla nəticələnəcəyi təqdirdə Avropa İttifaqının (Aİ) əks tədbirlər görəcəyini vəd edib.

Oxu.Az-ın məlumatına görə bu barədə o, xüsusi video müraciətində bəyan edib.

"Biz ABŞ ilə ticarət maneələrinin ləğvi barədə danışıqlara çağırırıq. Lakin fəaliyyətə hazırıq: İlk cavab tədbirləri paketinin hazırlanması mərhələsi yekunlaşmaq üzrədir və danışıqlar uğursuz olarsa, bu tədbirlər dərhal tətbiq ediləcək", - deyə fon der Lyayen bildirib.

O, Trampın qərarından dərin təəssüf hissi keçirdiyini vurğulayıb.

"Dünya iqtisadiyyatı ciddi əziyyət çəkəcək, nəticələr dünyanın bütün ölkələri üçün fəlakətli olacaq və ən həssas əhali təbəqələrinə güclü zərbə vuracaq", - deyə o bəyan edib.

Avropa Komissiyasının sədri cəmiyyəti birliyə və Avropa istehsalçılarının müdafiəsinə çağırıb.

Xatırladaq ki, Tramp xeyli sayda ölkəyə rüsumlar tətbiq edib, siyahıda Azərbaycan da var.

Avropa ABŞ rüsumlarına cavab hazırlayır: "Nəticələr dünyanın bütün ölkələri üçün fəlakətli olacaq"