Azərbaycan yeni hərbi texnika hazırlayıb – Foto

Azərbaycan Müdafiə Sənayesi Nazirliyinin (MSN) istehsal etdiyi və modernləşdirdiyi bir sıra hərbi texnikalar Bakıda keçiriləcək “Azərbaycan 10 il” sərgisində nümayiş olunacaq.

Oxu.Az APA-ya istinadən xəbər verir ki, Azərbaycan mühəndisləri tərəfindən yaradılmış kəşfiyyat döyüş maşını, Azərbaycanda modernləşdirilmiş BTR-70, BRDM tipli kəşfiyyat maşını, CAR-ın “Paramount Group” şirkəti ilə birgə istehsal edilmiş “Matador” və “Marauder” tipli minaya qarşı qorumalı nəqliyyat vasitələri sərgilənəcək.

Bununla yanaşı, MSN tərəfindən istehsal edilmiş “Gürzə” patrul maşını, tank əleyhinə idarə olunan raket kompleksləri ilə silahlandırılmış “Əqrəb” adlı maşın da təqdim olunacaq.

Sərgidə ayrıca olaraq MSN və İsrailin “Aeronautics Defense” şirkətinin birgə təsis etdiyi “Azad Systems Co” müəssisəsinndə istehsal edilən “Orbiter-2M” tipli mini, “Aerostar” tipli taktik pilotsuz uçuş aparatı, onların idarəetmə stansiyaları əyani şəkildə sərgilənəcək. Sərgidə MSN tərəfindən istehsal edilən aviasiya bombaları və digər məhsullar barədə məlumatlar da təqdim olunacaq.

Qeyd edək ki, Azərbaycan mühəndislər tərəfindən yaradılmış yeni kəşfiyyat döyüş maşını “Azərbaycan 10 il” sərgisində ilk eksperimental nümunəsi nümayişə çıxarılacaq.

BRDM-2 tipli kəşfiyyat-gözətçi maşınının şassisi üzərində hazırlanmış maşın həm xarici dizaynı, həm silahlanması, həm də performansı ilə BRDM maşınlarından əhəmiyyətli dərəcədə fərqlənir.

Döyüş maşını yerli mütəxəssislər tərəfindən yaradılmış idarəolunan qüllə ilə silahlandırılıb. Bu qüllənin silahlanmasına 2 lüləli 23 mm çaplı QŞ-23 topu, 7.62 mm çaplı PKT pulemyotu, 30 mm çaplı AQS-17 qumbaraatanı, S-8 (S-5) tipli 4 raketlik buraxma qurğusu, D-81 tipli bulud (tüstü) qurğusu daxildir. Maşın həmçinin gecə və gündüz, hər cür hava şəraitində müşahidənin aparılması üçün görmə sistemlərinə malikdir. Maşının ön, arxa və yan və üst hissələrində görməni təmin edən kameralar yerləşdirilib, bu kameralardan qəbul edilən informasiyalar sürücü və komandirin gönündəki monitorlarda görünür.

Çəkisi 8152 kq təşkil edən kəşfiyyat-döyüş maşını 155 at gücünə malik (114 kVt) turbodizel mühərrikə, kombinə olunmuş hidropnevmatik transmissiyaya, beşpilləli, distansion ötürücü qutuya malikdir. Maşında 64 kubmetr/saniyə məhsuldarlığı olan, asılı olmayan fasiləsiz təminatlı kondisioner qurulub. Ümumi elektrik təminatı 7.8 kVt təşkil edən döyüş maşını 5 kVt gücə malik dizel generatoru ilə də təchiz olunub. Hamar yolda 110 km/saat, torpaq yolda 60-70 km/saat sürətlə hərəkət edə bilən maşının yanacaq tutumu 150 litr, bir çən yanacaqla birbaşa hərəkət uzaqlığı 800 km-dir.

www.oxu.az