"Azərbaycan iqtisadiyyatında baş verən müsbət dəyişiklikləri qiymətləndirərkən əsas diqqəti rəqəmlərlə yanaşı, onların arxasındakı nəticələrə yönəltmək vacibdir. Prezident İlham Əliyevin rəhbərliyi ilə Azərbaycanın son illərdə qarşısında duran böyük vəzifələri öz maliyyə imkanları hesabına həyata keçirməsi xüsusi əhəmiyyət daşıyır. Müdafiə qabiliyyətinin gücləndirilməsi, azad edilmiş ərazilərin bərpası və sosial proqramlar böyük vəsait tələb edir. Parlamentdə təqdim olunan məlumatlara görə, bu vəzifələr əlavə borclanmaya müraciət edilmədən ölkənin öz resursları hesabına maliyyələşdirilib. Bunun iqtisadi mənası odur ki, bugünkü mühüm ehtiyaclar qarşılanarkən gələcək nəsillərin üzərinə əlavə borc yükü qoyulmur".
Bunu Oxu.Az-a açıqlamasında Milli Məclisin İqtisadi siyasət, sənaye və sahibkarlıq komitəsinin üzvü, deputat Tahir Mirkişili deyib.
-tahir mirkisili:640.jpg)
O bildirib ki, maliyyə müstəqilliyi həm də dövlətin qərarvermə imkanlarını genişləndirir. Strateji valyuta ehtiyatlarının xarici dövlət borcunu təxminən 20 dəfə üstələməsi Azərbaycan üçün ciddi təhlükəsizlik ehtiyatıdır:
"Dünya bazarlarında qiymətlər dəyişəndə, xarici gəlirlər azalanda və ya gözlənilməz xərclər yarananda belə ehtiyatların olması iqtisadi sabitliyin qorunmasına və sosial öhdəliklərin yerinə yetirilməsinə kömək edir. Digər mühüm dəyişiklik iqtisadi artımın mənbələri ilə bağlıdır. 2026-cı ilin ilk on ayında artımın bütövlükdə qeyri-neft-qaz sektoru hesabına təmin olunması göstərir ki, iqtisadiyyatın digər sahələri getdikcə daha çox yük daşıyır. Əlbəttə, bu, neftdən asılılığın artıq aradan qalxması demək deyil. Ancaq istehsalın, xidmətlərin və sahibkarlığın genişlənməsi həmin asılılığın azalması üçün real zəmin yaradır. Bu dəyişiklik büdcədə də özünü göstərir. 2026-cı ilin dövlət büdcəsində qeyri-neft-qaz daxilolmalarının 22,2 milyard manata çatacağı gözlənilir. Bu gəlirlərin artması təhsil, səhiyyə, sosial müdafiə və infrastruktur xərclərinin daha dayanıqlı mənbələr hesabına maliyyələşdirilməsi imkanlarını genişləndirir. Burada əsas prinsip sahibkarın üzərinə daha çox yük qoymaq deyil, daha çox sahibkarın fəaliyyət göstərməsinə, böyüməsinə və şəffaf işləməsinə şərait yaratmaqdır".
"Vətəndaş üçün ən aydın nəticələrdən biri rəsmi məşğulluqdur. 2019-cu ilin əvvəlindən qeyri-neft-qaz özəl sektorunda əmək müqavilələrinin sayı iki dəfədən çox artıb, bu sektorun ümumi əmək müqavilələrində payı 57 faizə yüksəlib. Bu artım həm iş imkanlarının genişlənməsini, həm də əmək münasibətlərinin rəsmiləşməsini əks etdirir. Əmək müqaviləsi insanın hüquqlarının qorunması, sosial sığorta təminatı və gələcək pensiyası baxımından əhəmiyyətlidir. Ona görə də məşğulluğun keyfiyyəti ən azı onun sayı qədər vacibdir. Qeyri-neft-qaz mallarının ixracının bu ilin sonunda 4,2 milyard dolları ötəcəyinin gözlənilməsi də mühüm göstəricidir. Xarici bazarda satılan Azərbaycan məhsulu ölkəyə valyuta gətirməklə yanaşı, yerli müəssisələrin sifarişlərini artırır, istehsalın genişlənməsinə və yeni iş yerlərinin yaradılmasına imkan yaradır. İxrac edən müəssisə məhsulunun keyfiyyətini, texnologiyasını və məhsuldarlığını da yüksəltməli olur. Beləliklə, xarici bazara çıxış bütövlükdə iqtisadiyyatın rəqabət qabiliyyətinə təsir göstərir", - deyə deputat vurğulayıb.
Onun sözlərinə görə, 2030-cu ildə qeyri-neft-qaz sektorunun iqtisadiyyatda payının 82 faizə yüksələcəyi proqnozlaşdırılır:
"Bu perspektivi dəyərləndirərkən həmin sahələrdə real istehsala, məhsuldarlığa və yaradılan gəlirlərə də baxmalıyıq. Əminəm ki, məqsəd daha çox əlavə dəyər yaradan müəssisələrin, daha yüksək maaşlı iş yerlərinin və dünya bazarında rəqabət apara bilən məhsulların sayının artırılması olacaq. Hesab edirəm ki, növbəti mərhələdə əsas diqqət sahibkarların maliyyəyə çıxışına, ədalətli rəqabətə, peşə bacarıqlarına və dövlət vəsaitlərinin səmərəliliyinə yönələcək. İqtisadi artımın faydasını regionlarda yaşayan ailələrin, kiçik biznes sahiblərinin və əmək bazarına yeni daxil olan gənclərin daha çox hiss etməsi vacibdir. Gəlirlərin artması ilə yanaşı, onların alıcılıq qabiliyyətinin qorunması da əsas meyarlardandır. Azərbaycanın güclü maliyyə imkanları bunun üçün mühüm əsas yaradır. Qarşıdakı vəzifə bu imkanları davamlı istehsala, keyfiyyətli məşğulluğa və daha yaxşı dövlət xidmətlərinə çevirməkdir. Çünki iqtisadi gücün vətəndaş üçün ən konkret ifadəsi sabit iş, ailəsinin ehtiyaclarını qarşılayan gəlir və sabaha inamdır. Bu isə Azərbaycanda dövlətin iqtisadi siyasətinin əsas hədəfidir".