Bu ilin yanvar-noyabr ayları ərzində Azərbaycanın xarici ticarət əməliyyatları üzrə dövriyyəsi 28 milyard 214 milyon 292 min ABŞ dolları olub. Bu rəqəm Azərbaycan dünyanın 182 ölkəsi ilə ticarət əməliyyatları nəticəsində formalaşıb.
Oxu.Az xəbər verir ki, bu, ötən ilin eyni dövrü ilə müqayisədə 39,04 faiz, yəni 7 milyard 922 milyon dollar çoxdur.
Dövlət Gömrük Komitəsinin məlumatına görə, bu ilin ötən on bir ayında idxal əməliyyatları 32,15 faiz artaraq 10 milyard 295 milyon 486 min dollar olub. İxrac əməliyyatları üzrə dövriyyə isə ötənilki göstəricini 43,34 faiz üstələyərək, 17 milyard 918 milyon 805 min dollara çatıb.
İxrac həcminin idxalı üstələməsi nəticəsində ölkənin ticarət balansında 7 milyard 623 milyon 318 min dollar məbləğində müsbət saldo yaranıb. Bu isə 2017-ci ilin on bir ayındakı statistikadan 61,84 faiz çoxdur.
İxracın strukturunda 81,6 faiz neftin, 2,68 faiz neft məhsullarının, 7,01 faiz təbii qazın, 0,36 faiz elektrik enerjisinin, 2,76 faiz meyvə-tərəvəz məhsullarının, 0,05 faiz çayın, 0,08 faiz bitki və heyvan mənşəli yağların, 0,13 faiz qəndin, 0,08 faiz spirtli və spirtsiz məhsulların, 0,41 faiz kimya məhsullarının, 0,62 faiz plastik kütlələr və onlardan hazırlanan məmulatların, 0,4 pambıq, 0,12 faiz pambıq ipliyin, 0,44 faiz qara metal və ondan hazırlanan məmulatların, 0,59 faiz alüminium və ondan hazırlanan məmulatların, 2,67 faiz digər məhsulların payına düşüb.
İdxal məhsullarının strukturunda isə yenə də ərzaq liderdir: 11,91 faiz. Bundan başqa, ölkəyə gətirilən mal və məhsulların sırasında 1,34 faiz tütün və tütün məhsullarının, 0,09 faiz sementin, 2,59 faiz əczaçılıq məhsullarının, 3,22 faiz plastik kütlələr və onlardan hazırlanan məmulatların, 2,63 faiz odun və ağac məhsullarının, 10,83 faiz qara metal və ondan hazırlanan məmulatların, 22,18 faiz maşın, mexanizm və elektrik aparatlarının, o cümlədən onların ehtiyat hissələrinin, 7,62 faiz nəqliyyat vasitələri və onların ehtiyat hissələrinin, 0,92 faiz mebelin, 36,67 faiz digər məhsulların payına düşüb.
2018-ci ilin yanvar-noyabr aylarında xarici ticarət əməliyyatlarında 7,002 min özəl və dövlət müəssisəsi və 14,575 min fiziki şəxs iştirak edib.
Azərbaycandan ixrac edilən məhsulların əsas alıcıları İtaliya (ümumi ixracın 30,98%-i), Türkiyə (8,657%), İsrail (6,16%), Çexiya (4,58%), Almaniya (4,12%), Hindistan (4,18%), Tayvan (3,99%), əsas idxal əməliyyatları isə Rusiya (16,19%), Türkiyə (13,96%), Çin (10,23%), Almaniya (5,67%), ABŞ (463,%), İsveçrə (4,95%), Ukrayna (4,03%) və İranla (3,6%) olub.
İlhamə Abdullayeva
www.oxu.az
Oxu.Az yeniləndi!
