:1200.jpg)
“Azərsun Holdinq” məhsullarının bahalaşmasına münasibət bildirib.
Holdinq Mətbuat xidmətindən Oxu.Az-a daxil olan açıqlamada deyilir:
“Azərsun Holdinq” Azərbaycanda fəaliyyətə başladığı zamandan, ölkənin qida təminatı sahəsində fəaliyyət göstərərək çətin və böhranlı 90-cı illərdə ərzaq qıtlığının aradan qaldırılmasına mühüm töhfələr verib.
Şirkətlər qrupunun belə bir keşməkeşli dönəmlərdə fürsətçilik etməyərək, asan qazanc yolu tutmaması, xalqımız və Ümummilli liderimiz Heydər Əliyev tərəfindən təqdir edilib.
Məhz onun dəstəyilə müasir Azərbaycanda milli qida istehsalı sənayesinin əsası qoyulub, “Azərsun Holdinq” tərəfindən çox sayda istehsal müəssisələri qurulub istifadəyə verilib.
“Azərsun Holdinq”in həyata keçirdiyi layihələr dövlət başçısı İlham Əliyevin imzaladığı regionların sosial-iqtisadi inkişaf, yoxsulluğun azaldılması və iqtisadi inkişaf, əhalinin ərzaq məhsulları ilə etibarlı təminatına dair dövlət proqramları çərçivəsində Azərbaycan üçün yeni və müasir sənaye sahələrinin yaranmasına səbəb olub.
Müəssisələrimizin fəaliyyəti nəticəsində on minlərlə insan daimi işlə təmin olunub, bölgələrdə yaşayan fermer və təsərrüfatlarla əməkdaşlıq nəticəsində daha on minlərlə insanın isə məşğulluğuna şərait yaranıb.
Dövlət başçısı tərəfindən həyata keçirilən uzaqgörən siyasət nəticəsində, dövlətin qayğı və dəstəyilə qurulmuş müəssisələrimiz ölkənin təməl qida məhsullarına olan emal-istehsal təlabatını tam qarşılama gücündədir. Lakin istehsal üçün tələb olunan xammal, qablaşdırma, müxtəlif qatqı maddələrinin əksəriyyəti isə xarici bazarlardan alınır.
Son 5 ildə yerləşdiyimiz regiona göstərilən təzyiqlər, siyasi və iqtisadi proseslərlə bağlı, neftin qiymətinin 4 dəfə aşağı düşməsi və Azərbaycan Mərkəzi Bankı İdarə Heyətinin qərarına əsasən, manatın məzənnəsinin ABŞ dollarına nisbətən ucuzlaşması bütün sahələrdə olduğu kimi qida sənayesinə də təsir göstərib. Qeyd etməliyik ki, bütün regionda yaşanan iqtisadi böhran Rusiya, Türkiyə, Qazaxıstan və digər ölkələrdə üçrəqəmli devalvasiyaya səbəb olub.
Böyük hissəsi dünya birjalarında ABŞ dolları ilə satın alınan, müxtəlif beynəlxalq daşıma şirkətləri vasitəsilə Azərbaycana gətirilən xammal hesabına ölkəmizdə istehsal olunan məhsulların qiymətində də müəyyən tənzimləmələr qaçılmaz olub. Belə ki, il ərzində baş vermiş devalvasiyanın təsiri olaraq “Azərsun Holdinq” istehsal etdiyi məhsulların qiymətində ortalama 20-30 faiz qiymət artımına getməyə məcbur olub.
Mövcud vəziyyətin idarə edilməsi, təsirin minimuma endirilməsi məqsədi ilə “Azərsun Holdinq” bazarda tənzimləyici funksiyalar daşıyan İqtisadiyyat və Sənaye Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti və digər aidiyyətı dövlət qurumları ilə mütəmadi müzakirələr aparır.
Qeyd olunanları nəzərə alaraq Kütləvi İnformasiya Vasitələrini və bir sıra ekspertləri bu həssas dövrdə diqqətli olmağa, cəmiyyəti yanlış istiqamətləndirməməyə, şərhlər və məlumatlar verərkən yerli istehsal məhsullarının xammal təminatında idxal faktoru və valyuta ilə alınması amilini izah etməyi xahiş edirik.
Bəyan edirik ki, dövlət başçısı İlham Əliyevin ölkəmizdə iqtisadiyyatın liberallaşdırılması və sahibkarlığın inkişafı istiqamətində həyata keçirdiyi bütün addımları dəstəkləyir və əlbəttə ki, biz yerli istehsalçılar və digər idxal ilə məşğul olan biznesmenlər Azərbaycan dövləti və xalqı qarşısında son dərəcədə məsuliyyətli davranmalıyıq.
Bəs görəsən həyatında heç bir ciddi müəssisə yaratmayan və idarə etməyən insanlar, dünyadakı böhran və yerli istehsalat problemlərini yaşamamış təşkilatlar minlərlə insanın zəhmətini boşa sayaraq, “Qarabağ” kimi klubu Azərbaycana töhfə vermiş bir qurumu hədəf göstərməklə nəyə və kimə xidmət edirlər?”
Ülviyyə R. Əli
www.oxu.az
