"Azərsu ASC" teqi üzrə xəbərlər
Azərsu Açıq Səhmdar Cəmiyyəti ölkənin su təsərrüfatı və kanalizasiya sistemlərinin idarə olunması, yenidən qurulması və inkişafı sahəsində aparıcı dövlət qurumudur.
“Azərsu” Açıq Səhmdar Cəmiyyəti Azərbaycan Respublikası Prezidentinin 11 iyun 2004-cü il tarixli Sərəncamı ilə yaradılıb. "Azərsu" ASC suyun mənbələrdən götürülməsi, emalı, nəqli, anbarlanması və paylanmasını təşkil edir, istehlakçıları mərkəzləşdirilmiş qaydada içməli su ilə təchiz edir və onlara kanalizasiya xidmətləri göstərir, tulantı suların toplanması, nəqli, emalı və kənarlaşdırılmasını həyata keçirir. Səhmdar Cəmiyyət içməli və tullantı su sistemlərinin layihələndirilməsi, inşası, istismarı və onlara texniki xidmətlərin göstərilməsini təmin edir.
Son illərdə Azərsu tərəfindən həyata keçirilən layihələr nəticəsində regionlarda və Bakı şəhərində içməli su təchizatı və kanalizasiya sistemləri əhəmiyyətli dərəcədə yaxşılaşdırılmışdır.
Regionların sosial-iqtisadi inkişafına dair birinci Dövlət Proqramının qəbul edildiyi 2004-cü ildə Azərbaycanda içməli su ilə təminat 40 faiz səviyyəsində idi. Bu gün isə bu rəqəm 70 faizə çatıbdır. Bakı şəhərində içməli suyu davamlı şəkildə alan əhalinin sayı 29 faiz idi. Bu gün bu rəqəm təxminən 82 faizə çatıbdır. Regionlarda isə əhalinin içməli su ilə əhatə dairəsi cəmi 9 faiz idi. Bu gün bu rəqəm 63 faizdir.
Azərsu ölkənin su ehtiyatlarının qorunması, səmərəli istifadəsi və idarə olunmasında da mühüm rol oynayır. Qurumun gələcək planlarında yeni su anbarlarının və sutəmizləyici qurğuların inşası, mövcud infrastrukturun müasirləşdirilməsi və s. tədbirlər nəzərdə tutulur.
