Avqustun 12-16-da Gənclər və İdman Nazirliyinin dəstəyi, "Vikimedia Azərbaycan" istifadəçi qrupunun təşkilatçılığı və "Azərsun Holdinq"in sponsorluğu ilə "Wikipedia"nın 25 illik yubileyinə həsr olunmuş "Viki Mingəçeviri sevir" beynəlxalq düşərgəsi uğurla yekunlaşıb.
Beş gün davam edən layihənin əsas məqsədi Azərbaycan "viki-media" icmasının fəal üzvlərini və regional "viki-icma"ları bir araya gətirmək, bilik və təcrübə mübadiləsini təşviq etmək, eləcə də Azərbaycan dilində "Wikipedia"nın məzmun və keyfiyyət göstəricilərinin daha da yüksəldilməsinə töhfə vermək olub. Düşərgədə yerli mütəxəssislərlə yanaşı, beynəlxalq əməkdaşlıq çərçivəsində Türkiyə, Özbəkistan, Qazaxıstan və Qırğızıstandan 20-yə yaxın təcrübəli vikipediyaçı da iştirak edib.
Düşərgə çərçivəsində "Wikipedia"nın 25 illik inkişaf yolu nəzərdən keçirilib, təhsildə "Wikipedia"nın tətbiqi, mənbələrlə iş və neytrallıq prinsipləri, habelə "viki-layihə"lərdə süni intellekt, qadcetlər və akademik informasiya platformalarının istifadəsi kimi aktual mövzularda təlim və təqdimatlar keçirilib. Düşərgədə regional təcrübələrlə yanaşı, türkdilli dövlətlərin "viki-icma" layihələrinin uğurlu modulları, eləcə də "Wikimania 2026 (Paris)" yenilikləri geniş müzakirə olunub.
Keçirilən editatonlar (yazı marafonları) nəticəsində Azərbaycan gəncləri, idmanı və Mingəçevir mövzularında 512 yeni məqalə yaradılıb və 4000-dən çox redaktə həyata keçirilib.
İştirakçıların asudə vaxtının səmərəli təşkili məqsədilə kanoe və avarçəkmə bazası ilə tanışlıq, praktiki kanoe yürüşləri, habelə "Nə? Harada? Necə?" (NHN) və "Brain Ring" intellektual yarışları təşkil olunub. Tədbirin yekununda fəal iştirakçılara sertifikatlar təqdim edilib. Həmçinin düşərgə müddətində təşkil olunan müxtəlif yarış və müsabiqələrin qaliblərinə "Azərsun Holdinq" tərəfindən dəyərli hədiyyələr təqdim olunub.
Qeyd edək ki, "Azərsun Holdinq" gənclərin inkişafı və açıq bilik resurslarının zənginləşdirilməsi istiqamətində "Wikimedia Azərbaycan"la sıx əməkdaşlıq edir. Daha əvvəl bu əməkdaşlıq çərçivəsində həyata keçirilən "Wikisun" layihəsi nəticəsində holdinq əməkdaşları tərəfindən hazırlanan 5 000-ə yaxın məqalə "Wikipedia"ya yerləşdirilib.
Şirkətin "Viki Mingəçeviri sevir" beynəlxalq düşərgəsinə sponsorluq dəstəyi də Azərbaycan dilində rəqəmsal bilik bazasının inkişafına verilən növbəti mühüm töhfəsidir.
