"Azərbaycan Dövlət Neft Şirkəti (SOCAR) hazırda ilkin kütləvi yerləşdirmə (IPO) haqqında düşünmür".
Oxu.Az xəbər verir ki, bunu SOCAR-ın vitse-prezidenti Əfqan İsayev "Euronews"a müsahibəsində bildirib.
O qeyd edib ki, şirkət müəyyən aktivləri satır:
"Keçən il biz "Şahdəniz" layihəsinin 5 %-ni enerji bazarının qlobal oyunçularından biri olan "MVM Energy" şirkətinə satdıq. Digər nümunə "Abşeron" qaz yatağıdır ki, burada SOCAR və "TotalEnergies" səhmdarlardır. 2023-cü ildə "Total" və SOCAR səhmlərinin bir hissəsini Əbu Dabi Milli Neft Şirkətinə satıb".
Əfqan İsayev aktivlərin alınması imkanlarından danışaraq bildirib ki, ötən il şirkət BƏƏ-də qaz yatağında pay alıb:
"Bu il sövdələşməni tamamladıq və Aralıq dənizinin şərqindəki "Tamar" yatağında pay əldə etdik. Bu, beynəlxalq inkişaf strategiyamızın mühüm hissəsidir. Təbii ki, qarşılıqlı faydalı yeni imkanlar yaranarsa, növbəti alışları nəzərdən keçirəcəyik".
