2025-ci ildə sahibkarlar KOB evlərinə daha çox yükdaşımaları həyata keçirmək üçün icazə blankı, fərqlənmə nişanı, poçt göndərişləri, mənşə sertifikatı, gömrük ximətləri, fitosanitar sertifikatın alınması üçün müraciət ediblər.
Oxu.Az xəbər verir ki, bu barədə Kiçik və Orta Biznesin İnkişafı Agentliyi (KOBİA) məlumat yayıb.
Ötən il KOB evlərində sahibkarlara daha çox "G2B" xidmət göstərmiş qurumlar aşağıdakılardır:
- Rəqəmsal İnkişaf və Nəqliyyat Nazirliyi - 257 699 (47.5%)
- "Azərpoçt" MMC - 96 902 (17.8%)
- Antiinhisar və İstehlak Bazarına Nəzarət Dövlət Agentliyi - 62 051 (11.4%)
- Dövlət Gömrük Komitəsi - 30 384 (5.6%)
- Qida Təhlükəsizliyi Agentliyi - 17 289 (3.2%)
Belə ki, KOB evlərində 2025-ci ildə biznes subyektlərinə göstərilmiş 543 033 xidmətin 464 325-i (85.5%) adıçəkilən qurumlar tərəfindən göstərilib.
Qeyd edək ki, KOB evləri sahibkarların dövlət ("G2B") və biznes ("B2B") xidmətlərinə vahid məkanda sürətli və rahat çıxışını təmin edən mərkəzlərdir. Sahibkarların "G2B" və "B2B" xidmətlərə KOB evləri vasitəsilə çıxması onların vaxtına və resurslarına qənaət etməsinə imkan verir. Hazırda Bakı, Yevlax, Xaçmaz və Şuşa şəhərlərində olmaqla ölkə üzrə 4 KOB evi, eləcə də "Xaçmaz KOB evi"nin Xudat şəhərində xidmət mərkəzi fəaliyyət göstərir. Bu KOB evləri yalnız adıçəkilən şəhərlərdə deyil, ətraf rayon və şəhərlərdə fəaliyyət göstərən sahibkarlara da xidmət edir. KOB evlərində sahibkarlara "G2B" xidmətlər üzrə biznesin qeydiyyatı, vergi və gömrük məsələləri, lisenziya, icazə, mənşə sertifikatı və s. kimi sənədlərin alınması, "B2B" xidmətlər üzrə bank, sığorta və digər növ xidmətlər təqdim olunur.
KOB evləri Kiçik və Orta Biznesin İnkişafı Agentliyinin (KOBİA) strukturuna daxildir. Agentlik tərəfindən KOB evlərinin funksionallığının və xidmət çeşidinin artırılması, coğrafi baxımdan genişləndirilməsi, rəqəmsal həllərin tətbiqi və proseslərin daha da sadələşdirilməsi istiqamətində işlər davam etdirilir. Artıq bir sıra ölkələr KOB evi təcrübəsi və onun ölkələrində tətbiqi ilə yaxından maraqlanırlar. Bu istiqamətdə bir neçə ölkənin müvafiq qurumu ilə əməkdaşlıq sənədləri də imzalanıb.
