"Azərbaycan və Türkiyə arasındakı qardaşlıq bağları dərin köklərə malikdir, xalqlarımızı ortaq tarix, din, oxşar adət-ənənələr və mədəniyyət birləşdirir. Ölkələrimiz arasında bütün istiqamətlərdə uğurla inkişaf edən əlaqələr dövlət başçılarımızın siyasi iradəsi və birgə səyləri sayəsində daha da güclənərək strateji müttəfiqlik səviyyəsinə çatıb".
Oxu.Az xəbər verir ki, bunu iqtisadiyyat nazirinin müavini Səməd Bəşirli II Azərbaycan-Türkiyə İnvestisiya Forumunda deyib.
"Xüsusilə, son illərdə çoxtərəfli münasibətlərimiz yüksələn xətt üzrə inkişaf edir, bu da ölkələrimizin iqtisadiyyatlarına əhəmiyyətli töhfə verir. Ölkəmizin artan nəqliyyat-tranzit imkanları, bu sahədə təşəbbüsçüsü və iştirakçısı olduğumuz regional və qlobal əhəmiyyətli layihələr, o cümlədən Orta Dəhlizin təqdim etdiyi logistika potensialı və digər layihələr Türkiyə ilə qarşılıqlı faydalı tərəfdaşlığımıza əlavə imkanlar açır. Orta Dəhlizin rəqəmsal həllərlə gücləndirilməsi və ticarətin asanlaşdırılması üzrə addımlar həm ölkələrimiz, həm də region üçün tranzit imkanlarını genişləndirir.
Yaxın illərdə Ələt Beynəlxalq Dəniz Ticarəti Limanının buraxılış qabiliyyəti ildə 25 milyon tona çatacaq. Bakı Beynəlxalq Dəniz Ticarət Limanı, doqquz beynəlxalq hava limanı, regionun ən böyük yük aviaşirkəti və digər amillər Azərbaycanı beynəlxalq nəqliyyat qovşağına çevirib. Bununla yanaşı, gələcəkdə Zəngəzur dəhlizi beynəlxalq daşımalar üçün tranzit imkanlarının genişləndirilməsinə öz töhfəsini verəcək", - deyə nazir müavini vurğulayıb.
Mərahim Nəsib
