Azərbaycanda ağır cinayət törətmiş şəxslərə qarşı cəzalar sərtləşdiriləcək.
Oxu.Az xəbər verir ki, bunu AzNews.az-a Milli Məclisin Hüquq siyasəti və dövlət quruculuğu komitəsinin üzvü Çingiz Qənizadə bildirib.
Onun sözlərinə görə, bunun üçün Cinayət Məcəlləsinin bir çox maddələrinə dəyişikliklər edilməsi nəzərdə tutulur.
Komitə üzvü deyib ki, elə cəzalar var ki, ölkə qanunvericiliyində bunun sərtləşdirilməsinə ehtiyac görülür:
“Bunun üçün təmsil etdiyim Komitədə qərara alınıb ki, Cinayət Məcəlləsinin bir çox maddələrinə dəyişiklik edilsin və bəzi cinayət növləri üzrə 25 ilə qədər cəzalar artırılsın. Burda ağır cinayətlərdə - dini radikal və silahlı birləşmələr, adam öldürmə hallarına görə cəzalar sərtləşdiriləcək. Bu, müsbətdir. Hazırda bu müzakirə mövzusudur. Konkret hansı maddələrin üzərində durulması haqda isə ayın 30-dək KİV-lərə açıqlama veriləcək”.
Ç.Qənizadə vurğulayıb ki, Cinayət Məcəlləsinin maddələrinə dəyişiklik may ayının 30-dək Milli Məclisin Komitə iclaslarında baxılıb plenar iclasa çıxarılacaq.
