Casusluqda ittiham olunanlar hakim qarşısına çıxarıldı

Azərbaycanda casusluqda ittiham olunanlar Martin Ryan və Azad Məmmədli barəsində Azərbaycan Respublikası Dövlət Təhlükəsizliyi Xidmətində (DTX) başlanılmış cinayət işinin ilk məhkəmə hazırlıq iclası keçirilib.

Oxu.Az xəbər verir ki, Bakı Ağır Cinayətlər Məhkəməsinin hakimi Elmin Rüstəmovun sədrliyi ilə keçirilən iclasda təqsirləndirilənlərin anket məlumatları dəqiqləşdirilib. Azad Məmmədlinin vəkili vəsatət qaldıraraq müvəkkili barədə seçilmiş həbs qətimkan tədbirinin ev dustaqlığı ilə təmin olunmasını istəyib. Dövlət ittihamçısı isə öz növbəsində buna münasibət bildirərək vəsatətin təmin olunmasına hər hansı bir əsasın olmadığını deyib. Məhkəmə vəsatəti təmin etməyərək cinayət işinin məhkəmə baxışına verilməsi ilə bağlı qərar qəbul edib.

Martin Ryanın vəkilinin qaldırdığı vəsatət isə prosesin qapalı keçirilməsi ilə bağlı olub. Buna görə isə məhkəmə heyəti iclasda xarici ölkə səfirlik nümayəndələrinin iştirakının şəffaf təmin edilməsi məqsədilə iclasların açıq keçirilməsini məqsədəmüvafiq hesab edib. Məhkəmənin növbəti iclası 6 yanvar 2025-ci ilə təyin edilib.

Anket məlumatları zamanı bəlli olub ki, Martin Ryan 1988-ci ildə Fransada anadan olub, ali təhsillidir, Fransada Monpelye 3 Universitetini "beynəlxalq əlaqələr, hərbi tarix və geosiyasət" ixtisası üzrə bitirib, əvvəllər məhkum olunmayıb. Azərbaycanda sahibkarlıq və fransız şərablarının idxalı ilə məşğul olub.

Digər təqsirləndirilən şəxs Azad Məmmədli isə Moskva Dövlət Beynəlxalq Əlaqələr İnstitutunun beynəlxalq hüquq fakültəsini bitirib, sonra magistr təhsilini Fransada davam etdirib. 2019-2023-cü illərdə Beynəlxalq Bankda hüquqşünas işləyib. 2023-cü ildə bir müddətlik Böyük Britaniyaya köçüb, ölkəyə qayıdandan bir müddət sonra həbs olunub.

Qeyd edək ki, Fransaya casusluqda ittiham edilərək həbs olunan Martin Ryan barəsində DTX-də aparılan cinayət işinin ibtidai istintaqı yekunlaşdırılaraq Bakı Ağır Cinayətlər Məhkəməsinə göndərilib.

Martin Ryan və digərləri 2023-cü il dekabrın 4-də həbs olunub. "Merkorama" MMC-nin baş direktoru olan Martin Ryana qarşı casusluq ittihamı irəli sürülüb.

İttihama görə Martin Ryan onu məxfi əməkdaşlığa cəlb edən, sonradan Bakıdan "persona non-qrata" elan edilərək qovulmuş Fransanın DGSE (Xarici Təhlükəsizlik Baş İdarəsi) əməkdaşları tərəfindən agent-casus kimi istifadə edilib.

Həmin cinayət işi üzrə Martin Ryanla yanaşı, Azərbaycan Respublikasının vətəndaşı Azad Məmmədlinin "dövlətə xəyanət" ittihamı ilə mühakimə olunacağı bəlli olub.

Məlum olduğu kimi, geniş casus şəbəkəsinin ifşasından və xidməti uğursuzluqlardan sonra 2023-cü il dekabr ayının 20-də Fransa Xarici Təhlükəsizlik Baş İdarəsinin (DGSE) rəisi Bernar Emye həmin vəzifəsindən azad edilib.