Ərinin qətlini sifariş verməkdə təqsirləndirilən Əzizə Seyidova və qətlin sifarişini isə icra etməkdə təqsirləndirilənlər - Mehdi Məmmədli, Elvin Əliyev və Bəxtiyar Fərzəliyevin cinayət isinin növbəti məhkəmə prosesi keçirilib.
Oxu.Az-ın məlumatına görə, məhkəmə istintaqı, Bakı Ağır Cinayətlər Məhkəməsində hakim Roman Ələkbərlinin sədrliyi ilə keçirilən prosesdə mərhum Əli Seyidovun anası Pəricahan Seyidovanın sərbəst ifadəsi dinlənilib. O, təqsirləndirilənlərdən Əzizə Seyidovadan başqa digər təqsirləndirilənləri tanımadığını deyib:
"Mən onlara gələndə uşağım qan içində çapalayırdı, üç bıçaq vurulmuşdu ona. Onlar bir-birini sevib evlənmişdilər, qısqanclığa görə tez-tez mübahisələri olurdu".
"Əzizə Seyidovanın ərini siçan zəhəri ilə zəhərləmək istəməsi" məsələsi ilə bağlı şahid bildirib ki, həmin siçan zəhərini oğlunun yaşadığı evdəki dolabdan tapıb.
Şahidin bu ifadəsi isə məhkəmə heyətinin təəccübünə səbəb olub.
Buna görə də hakim şahiddən bu barədə vaxtında kiməsə niyə hər hansı bir məlumat verməməsini soruşduqda Pəricahan Seyidova həmin zəhəri kiməsə demədən zibilliyə atdığını deyib.
Daha sonra mərhum Əli Seyidovun qardaşı Ayaz Seyidov ifadəsi zamanı hadisə baş verən günü evdə olduğunu bildirib:
"Biz qardaşım Əli ilə yaxın yaşayırdıq. Həmin gün axşam vaxtı idi, evdə idim. Səs-küy eşidib evdən küçəyə qaçdım, kimsəni görmədim".
Digər ifadə verən şahid isə Əli Seyidovun atası və hüquqi varisi Yaşar Seyidov olub.
O təqsirləndirilən şəxslərdən şikayətçi olduğunu, onlara layiq olduqları cəzanın verilməsini məhkəmədən xahiş edib.
Növbəti prosesi noyabrın 3-nə təyin edilib.
Qeyd edək ki, hadisə 2023-cü il martın 15-də Sabunçu rayonunun Maştağa qəsəbəsində baş verib. Ə.Seyidovaya Cinayət Məcəlləsinin 32.3, 32.4, 120.2.1, 120.2.4, 120.2.5-ci (qabaqcadan əlbir olan bir qrup şəxs halında, xüsusi amansızlıqla, tamah məqsədilə və sifarişlə qəsdən adam öldürməyə təhrik etmə və cinayəti təşkil etmə), Mehdi Məmmədov, Bəxtiyar Fərzəliyev və Elvin Əliyevə isə həmin məcəllənin 120.2.1, 120.2.4, 120.2.5-ci (qabaqcadan əlbir olan bir qrup şəxs halında, xüsusi amansızlıqla, tamah məqsədilə və sifarişlə qəsdən adam öldürmə) maddələri ilə ittiham irəli sürülüb.
İttihama görə, 23 yaşlı Əzizə Seyidova həyat yoldaşı Əli Seyidovu cəzalandırmaq istəyib.
O, ərinin qətlini tanışı Mehdi Məmmədliyə sifariş verib. Onlar birlikdə plan qurub, Ə.Seyidovun evə gəlib-getmə vaxtlarını dəqiqləşdiriblər. 2023-ci il martın 15-də Ə.Seyidova M.Məmmədli ilə əlaqə saxlayıb, ərini məhz həmin gün öldürməyi tapşırıb. Bundan sonra M.Məmmədli dostları ilə birlikdə gecə saatlarında Ə.Seyidovun yaşadığı ünvanın yaxınlığına gələrək gözləyiblər. Ə.Seyidov evinə daxil olmaq istədikdə M.Məmmədli və dostları onun qarşısını kəsərək, ona 23 bıçaq zərbəsi endirməklə qətlə yetiriblər.
Onu da qeyd edək ki, daha öncəki məhkəmə prosesləri zamanı Əzizə Seyidova elan olunan ittihamla özünü təqsirli bilməyib. Digər təqsirləndirilənlər - Mehdi Məmmədli, Elvin Əliyev və Bəxtiyar Fərzəliyev isə özlərini qismən təqsirli biliblər.
Elgün Həsənli
