Qırmızı planetin sirləri: Marsdakı kurqanlar nəyi göstərir?

Britaniyalı alimlər Marsın öyrənilməsində irəliləyiş əldə ediblər. Onlar Qırmızı planetdə uzaq keçmişdə suyun mövcudluğuna dair inandırıcı sübutlar tapmağa nail olublar.

Oxu.Az-ın verdiyi məlumatra görə, London Təbiət Tarixi Muzeyi tərəfindən aparılan tədqiqatın nəticələri nüfuzlu "Nature Geoscience" elmi jurnalında dərc edilib.

Mütəxəssislər qrupu orbital aparatlardan əldə edilmiş Marsın şimal düzənliklərinin yüksəkkeyfiyyətli təsvirlərini və torpaq tərkibi haqqında məlumatları təhlil edib. Onların diqqət mərkəzində hündürlüyü 500 metrə çatan sirli təpələr və kurqanlar olub. Məlum olub ki, bu formalaşmalar milyardlarla il əvvəl intensiv eroziyaya uğramış qədim yaylaqların qalıqlarıdır.

Lakin əsas tapıntı təpələrin tərkibində gilli mineralların aşkar edilməsi olub. Bu maddələr yalnız dağ süxurlarının su ilə uzunmüddətli qarşılıqlı təsiri nəticəsində əmələ gəlir. Deməli, kurqanlar milyonlarla il ərzində rütubətli iqlim şəraitində formalaşıblar. Alimlər, həmçinin tədqiq edilmiş obyektlərin "ExoMars-2020" missiyasının marsoxodunun enməsi nəzərdə tutulan "Oxia Planum" düzənlikləri ilə geoloji əlaqəsini müəyyən ediblər.

Alimlərin sözlərinə görə, Mars Yerin erkən dövrünün unikal modelidir. Tektonik proseslərin olmaması səbəbindən onun qədim geologiyası demək olar ki, ilkin vəziyyətdə qorunub saxlanılıb.