Bu yaxınlarda beynəlxalq alimlər qrupu meta-təhlil zamanı solaxaylıq (hər iki əli eyni dərəcədə işlətmək qabiliyyəti) ilə disleksiya, şizofreniya və autizm kimi bir sıra nevroloji pozuntular arasında əlaqə aşkar ediblər. Bu pozuntular tez-tez həyatın erkən dövründə ortaya çıxır və dilin müəyyən aspektlərini mənimsəməkdə çətinliklərlə müşayiət olunur.
Oxu.Az xəbər verir ki, bu barədə araşdırma "Psychological Bulletin" jurnalında dərc olunub.
"Biz təxmin etdik ki, solaxaylıq simptomlarının dillə əlaqəli olan pozuntularla bağlı olma ehtimalı var. Hər ikisi beynin bir tərəfində yerləşdiyi üçün onların inkişafı və pozulması bir-biri ilə əlaqəli ola bilər", - deyə Rur Universitetinin (Boxum, Almaniya) Koqnitiv Neyrologiya İnstitutundan doktor Culian Pakheyzer izah edib.
Tədqiqatçılar həmçinin solaxaylığın həyatın erkən dövründə özünü göstərən xəstəliklərlə əlaqəli ola biləcəyini irəli sürüblər. Çünki uşağın hansı əlindən daha çox istifadə etdiyi inkişafın erkən mərhələsində artıq aydın görünür.
"Hər iki fərziyyə təsdiqləndi. Məsələn, solaxaylıq və ambidekstriya (hər iki əldən eyni dərəcədə istifadə bacarığı) sağlam insanlarla müqayisədə disleksiyası olan şəxslərdə statistik cəhətdən əhəmiyyətli dərəcədə daha çox müşahidə olunur", - Hamburq Tibb Məktəbindən professor Sebastyan Oklenburq qeyd edib.
Bununla belə, solaxaylıqla, adətən 30 yaş ətrafında ortaya çıxan depressiya arasında heç bir əlaqə aşkar edilməyib.
Müəlliflərin fikrincə, bu nəticələr solaxaylıqla müxtəlif nitq pozuntularının beynin erkən inkişafında üst-üstə düşən proseslərdən qaynaqlandığını göstərir.
