Nitqin olmaması heç də həmişə inkişaf ləngiməsinin göstəricisi deyil. Lakin bəzi simptomlar mütləq nevroloq müayinəsi tələb edir.
Oxu.Az xəbər verir ki, bunu Kp.ru-ya rusiyalı həkim-nevroloq Nataliya Yerşova deyib.
Mütəxəssisin sözlərinə görə, əgər uşaq ona deyilənləri anlayırsa, xahişləri yerinə yetirirsə, yaşına uyğun digər bacarıqlara yiyələnirsə və qazandığı vərdişləri itirmirsə, üç yaşına qədər onu sadəcə müşahidə etmək olar.
Həmçinin valideynlərdən hər hansı birinin gec danışması kimi irsi faktorlar da burada rol oynaya bilər. Həkimin fikrincə, 3-4 aylığında uşağın qığıldamaması, 8 aylığında hecaları tələffüz etməməsi və 1,5 yaşında nitqi başa düşməməsi narahatlıq üçün əsasdır.
Uşaq əvvəllər danışdığı halda sonradan susursa, bu cür reqressiya halına xüsusi diqqət yetirilməlidir. Bəzi sözləri deməsinə baxmayaraq, jestlərin və göz təmasının olmaması, uşağın iki yaş yarımından sonra barmaq uclarında gəzməsi, reflekslərin asimmetriyası, əşyaların tez-tez əlindən düşməsi və digər nevroloji əlamətlər də müayinə üçün səbəb sayılır. Üç yaşına çatmış uşaq 3-4 sözdən ibarət cümlələr qura bilmirsə, sadə suallar vermirsə və ya onun nitqi başqaları üçün aydın deyilsə, həkim eşitmə qabiliyyətini yoxlamağı, EEQ etdirməyi və mütəxəssislərə müraciət etməyi məsləhət görür. Uşağın söz ehtiyatı bir neçə ay ərzində ümumiyyətlə artmırsa, həkimlə məsləhətləşməni təxirə salmaq olmaz.
