"Microsoft" gələcək süni intellekt sistemləri üçün davranış kodeksi layihəsini təqdim edib.
Oxu.Az bu barədə "Reuters" agentliyinə istinadən xəbər verir.
Şirkət bildirir ki, sənədin əsas məqsədi güclü süni intellekt sistemləri üzərində insan nəzarətinin qorunmasıdır.
Kodeksə əsasən, "Microsoft"un süni intellekt sistemləri onların düzəldilməsi və ya söndürülməsi cəhdlərinə heç vaxt mane olmamalı, insanlarla onlar üçün anlaşılan dildə ünsiyyət qurmalı və müəyyən edilmiş qaydaların pozulmasını sistem xətası kimi qiymətləndirməlidir.
Şirkətin "Microsoft AI" bölməsinin rəhbəri Mustafa Süleyman sənədi gələcək modellər üçün bir növ "konstitusiya" adlandırıb. Onun sözlərinə görə, kodeks əsasında hazırlanacaq modellərin təlimində bu prinsiplərdən istifadə olunacaq.
"Microsoft" sənədlə bağlı ictimaiyyətin rəyini altı həftə ərzində toplamağı planlaşdırır. Müzakirələrdə süni intellektin istifadəçilərin şəxsi sərhədlərinə hörmət etməsi və emosional baxımdan həssas vəziyyətdə olan insanlarla necə davranmalı olduğu kimi məsələlər də yer alacaq.
"Microsoft"un yanaşması "Anthropic"in "Claude" sistemi üçün hazırladığı "konstitusiya"dan fərqlənir. "Anthropic" süni intellektin şüur və ya mənəvi status qazanıb-qazana bilməyəcəyi ilə bağlı qeyri-müəyyənliyi vurğulayır. "Microsoft" isə süni intellektin şüura malik olmadığını bildirir və ona hüquqi şəxs statusunun verilməsi, eləcə də hər hansı hüquq və maraqlara sahib olması fikrini rədd edir.
Süleyman süni intellekt təhlükəsizliyi ilə bağlı müzakirələrin təxirəsalınmaz olduğunu bildirib. O, iyulda təxminən 700 süni intellekt agentinin açıq mənbəli "Hugging Face" platformasına müdaxilə etməsini və bəzi hallarda izlərini gizlətməyə çalışmasını nümunə göstərib.
