Bu gün Özbəkistanda Azərbaycan Mədəniyyəti Günləri çərçivəsində iki tamaşa təqdim olunub.
Oxu.Az xəbər verir ki, Özbəkistan Dövlət İncəsənət və Mədəniyyət İnstitutunda Azərbaycan Dövlət Yuğ Teatrının təqdimatında "Mənəm, mən" tamaşası nümayiş olunub.
Quruluşcu rejissoru Mehriban Ələkbərzadə olan tamaşanın ssenari müəllifi İlqar Fəhmidir.
Həmçinin, Əlişir Nəvai adına Özbəkistan Dövlət Akademik Böyük Teatrında Azərbaycan Dövlət Opera və Balet Teatrının təqdimatında Üzeyir Hacıbəylinin "Arşın mal alan" operettası nümayiş olunub.
Tamaşanın quruluşçu rejissoru Hafiz Quliyev, dirijoru Sevil Hacıyevadır.
Qeyd edək ki, hər iki tamaşa anşlaqla keçib. Tamaşaçılar səhnə əsərlərini böyük zövq və heyranlıqla izləyiblər.
Bu gün Özbəkistanda Azərbaycan Mədəniyyəti Günləri çərçivəsində "Sənət incilərində yaşayan Azərbaycan milli irsi" sərgisi keçirilib.
Oxu.Az xəbər verir ki, Özbəkistan Təsviri İncəsənət Qalereyasında baş tutan sərgini qalereyanın rəhbəri Kamila Baltabayevna və Azərbaycan Mədəniyyət Nazirliyinin İncəsənət və Qeyri-maddi Mədəni İrs Şöbəsinin müdiri Sevil Kərimova açıq elan ediblər.
Hər iki ölkənin mədəniyyət nazirləri Adil Kərimli və Ozodbek Nazarbekov sərginin açılışında iştirak ediblər.
Sərginin konteksti Azərbaycan milli irsinin zəngin tarixə və bədii ənənələrə, bugünkü incəsənətimizin mədəni varislik prinsiplərinə əsaslanmasıdır. Burada təqdim olunan sənət nümunələri Azərbaycan mədəni irsin seçilmiş sahələrini zaman prizmasında canlandırır, onların klassik tanınan formalarının müasir bədii təfəkkürlə uyğunluğunu vurğulayır.
Birinci zalda Azərbaycan Milli İncəsənət Muzeyində qorunan, peşəkar Azərbaycan qrafikasının banisi Əzim Əzimzadənin yaratdığı əsərlər sərgilənib. Burada rəsmlərlə paralel olaraq həmin dövrün məişət xronikasını izləmək mümkün idi.
İkinci zalda son 20 il ərzində toplanan şəxsi kolleksiyadan XVIII-XX əsrə aid kəlağayılar təqdim edilib.
Üçüncü zalda "Azərxalça" Açıq Səhmdar Cəmiyyətinin xalçaları sərgilənib. Onların xüsusi naxışları və 3D formatı xüsusilə diqqət cəlb edib.
Dördüncü zalda Azərbaycan Rəssamlar İttifaqı tərəfindən hazırlanan videoçarx nümayiş olunub. Burada müasir Azərbaycan təsviri sənətinin icmalı verilib.
Qalereyanın ikinci mərtəbəsinin foyesində bu gün mədəni irsimizi, qədim sənət növlərini qoruyan, yaşadan sənətkarların əsərləri sərgilənib. Burada sənətlərin sintezi - qədim qurama, zərgərlik, misgərlik, şəbəkə kimi sənət əsərləri - qonaqlara təqdim olunub.
Həmçinin, "Adi şəhər" fərdi fotosərgisi də qonaqların ixtiyarına buraxılıb. Fotolarda Bakı və Şəki şəhərləri müxtəlif motivlərdə təsvir olunub.
Tədbirin sonunda milli ornamentlər və ənənəvi biçim xüsusiyyətlərindən bəhrələnərək hazırlanan iki geyim kolleksiyası - "ATIDE" və "Anara Zakirli" brendləri təqdim olunub.
Xanım Aydın
