Hollivud ulduzu Jan-Klod Van Damma qarşı insan alveri ilə bağlı cinayət işinin təfərrüatı məlum olub.
Oxu.Az-ın verdiyi məlumata görə, bu barədə aktyorun işində zərərçəkmiş Yuliana Dabın vəkili Adrian Kukulis "İzvestiya"ya danışıb.
Adrian Kukulisin sözlərinə görə, 2020-ci ildə Rumıniyada başlanılan istintaq, əslində, 10 il əvvəl Fransanın Kann şəhərində baş verdiyi güman edilən hadisələrlə bağlıdır.
Hüquqşünas işin qisas və ya məşhur şəxsiyyəti şantaj etmək cəhdi ola biləcəyi ehtimallarını qəti şəkildə rədd edib.
"Bu qisas deyil və bu 20 il əvvəl baş verib. Yuliya bu barədə üç həftə əvvəl öyrənib, aktyora qarşı cinayət şikayəti iki həftə əvvəl təqdim edilib, bu isə çox yaxın zamandır. Ona görə hər şey məntiqlidir", - deyə Kukulis qeyd edib.
Vəkilin fikrincə, media susur, çünki onlar ciddi ittihamdan şoka düşüblər. O qeyd edib ki, aktyorun agentləri bəyanatla çıxış ediblər ki, bu spekulyasiya olduğu üçün heç nəyi şərh etməyəcəklər.
"Bu isə spekulyasiya deyil, Van Damma qarşı rəsmi ittihаmlardır", - deyə o vurğulayıb.
Qeyd edək ki, qalmaqal aprelin 2-də bir sıra beynəlxalq KİV-də "Qanlı idman", "Kikboksçu" və "Universal əsgər" adlı kult filmlərin ulduzunun insan alveri şəbəkəsində iştirakda ittiham olunduğu barədə məlumatların yayılmasından sonra yaranıb. Bu mənbələrin məlumatlarına görə, Van Damm Kannda beş gənc rumıniyalı qızla vaxt keçirib. Onların arasında azyaşlıların da olduğu iddia edilib. Belə görüşlərdə iştirak etdiyi iddia olunan qızlardan biri bu ittihamları təsdiqləyib.
Jan-Klod Van Dammın nümayəndəsi aktyora qarşı qaldırılan ittihamları rəsmi şəkildə təkzib edib.
Əgər əfsanəvi Hollivud aktyorunun günahı sübut olunarsa, o, Rumıniya qanunlarına əsasən cinayət məsuliyyətinə cəlb oluna bilər.
