Amerikalı aktyor, ikiqat "Oskar" mükafatı laureatı Cin Hekmenin ölüm səbəbi müəyyən edilib.
Oxu.Az xəbər verir ki, bu barədə "Fox News" telekanalı məhkəmə-tibbi ekspertizasının nəticələrinə istinadla məlumat yayıb.
Ekspertiza aktyorun uzun müddət davam edən ürək-damar xəstəliklərindən əziyyət çəkdiyini, konkret olaraq xroniki ürək çatışmazlığı və yüksək qan təzyiqi fonunda yaranan ağır böyrək dəyişiklikləri aşkar edib. Bundan əlavə, Hekmendə Altsheymer xəstəliyinə xas əlamətlər də qeydə alınıb.
Aktyorun həyat yoldaşı, pianoçu Betsi Arakavanın isə hantavirus pnevmoniya sindromu nəticəsində həyatını itirdiyi bildirilib. Qeyd olunur ki, hantaviruslar əsasən kiçik məməlilərdə müşahidə olunur, lakin insanlara keçdiyi hallarda ağır klinik fəsadlar, o cümlədən ağciyər zədələnməsi və ürək çatışmazlığı ilə nəticələnə bilər.
Xatırladaq ki, Cin Hekmen və Betsi Arakava bu il fevralın 26-da ABŞ-nin Nyu-Meksiko ştatındakı evlərində ölü tapılıblar. Polis orqanları onların ölümündə zorakılıq əlamətlərinin aşkar olunmadığını bildirib. Ölüm anında Hekmenin 95, Arakavanın isə 63 yaşı olub.
Cin Hekmenin aktyorluq karyerası 1960-cı illərdə başlayıb. O, 1967-ci ildə çəkildiyi "Bonnie and Clyde" filmi ilə tanınıb və ilk dəfə "Oskar" mükafatına namizəd göstərilmişdi. 1970-ci ildəki "I Never Sang for My Father" filmindəki rolu da ona növbəti "Oskar" namizədliyi qazandırıb.
Hekmenin böyük kino ulduzu kimi tanınması 1971-ci ildə "The French Connection" filmindəki baş rolu ilə bağlıdır. Bu obraz ona "Oskar", "Qızıl Qlobus" və BAFTA-nın "Ən yaxşı kişi rolu" mükafatlarını qazandırıb. Ona mükafat gətirən digər ekran işi "Unforgiven" (1993) filmidir.
