Kristofer Nolan Homerin məşhur "Odisseya" poemasını ekranlaşdırarkən filmin mümkün qədər real görünməsi üçün qeyri-adi üsullara əl atıb. Çəkilişlərdə müasir vikinqlər gəmisindən istifadə olunub, Troya mühasirəsinin canlandırılmasına təxminən 2 000 nəfər cəlb edilib, filmin IMAX 70 mm formatındakı hər bir nüsxəsi isə təxminən 17,7 kilometr uzunluğunda plyonkadan ibarət olub.
Oxu.Az bu barədə RBK-ya istinadən xəbər verir.
Odisseyin gəmisi rolunda vikinqlər gəmisi
Odisseyin gəmisini Oslo şəhərində yerləşən, uzunluğu təxminən 35 metr olan müasir vikinqlər gəmisinin rekonstruksiyası - "Draken Harald Hårfagre" canlandırıb. Ənənəvi üsullarla ağacdan hazırlanmış gəmi çəkilişlərdən əvvəl Atlantik okeanını da keçib.
Nolan dəniz səhnələrinin real gəmidə və açıq dənizdə çəkilməsini istəyib. Onun məqsədi səhnələrə, demək olar ki, sənədli film effekti vermək olub.
Troya mühasirəsində 2 000 nəfər
Troya mühasirəsinin çəkilişlərində təxminən 2 000 nəfər iştirak edib. Evrilox rolunu canlandıran Himeş Patel bildirib ki, alov, qışqırıqlar və döyüşən insanlarla dolu kütləvi səhnə filmin miqyasını ilk dəfə tam şəkildə dərk etdiyi an olub.
90 mərtəbə hündürlüyünə qalxıblar
Odisseyin sarayı təpənin zirvəsində yerləşən Santa Katerina qalasında lentə alınıb. Qalaya gedən yol boyunca hündürlük fərqi təxminən 274 metr təşkil edib ki, bu da 90 mərtəbəli binanın hündürlüyünə yaxındır.
Aktyorların və çəkiliş qrupunun bir hissəsi, o cümlədən Nolan özü hər gün təxminən 45 dəqiqə ərzində təpəyə qalxmalı olub.
Çəkilişlər altı ölkədə aparılıb
"Odisseya"nın çəkilişləri altı ay ərzində Yunanıstan, İtaliya, Mərakeş, İslandiya, Şotlandiya və ABŞ-da aparılıb.
Ümumilikdə istehsal prosesi 91 çəkiliş günü davam edib və planlaşdırılandan doqquz gün əvvəl başa çatıb.
Film tamamilə IMAX kameraları ilə çəkilib
"Odisseya" tarixdə tamamilə IMAX plyonkalı kameralarla çəkilmiş ilk tammetrajlı bədii film olub.
Filmin tam IMAX 70 mm versiyasını nümayiş etdirə bilən kinoteatrların sayı dünyada cəmi 41 olub. Onlardan 25-i ABŞ-da yerləşir. Seansların məhdud olması səbəbindən biletlər sürətlə satılıb və bəzi tamaşaçılar filmi izləmək üçün başqa şəhərlərə getməli olublar.
12 min sətir 172 dəqiqəyə sığışdırılıb
Homerin "Odisseya" əsəri 24 nəğmədən ibarətdir və təxminən 12 100 sətir həcmindədir. Nolan isə minilliklər əvvəl yazılmış bu əsəri 172 dəqiqəlik, yəni 2 saat 52 dəqiqəlik filmə uyğunlaşdırıb.
Köhnə kino peşəsi yenidən aktuallaşıb
IMAX 70 mm plyonkasının nümayişi xüsusi mütəxəssislər tələb edir. ABŞ-da kinomexaniklərin sayı 2012-ci ildə təxminən 8 000 olduğu halda, 2023-cü ildə bu göstərici 2 600 nəfərədək azalıb.
Premyera ərəfəsində IMAX 130 təcrübəli kinomexaniklə müqavilə bağlayıb və onların hər birindən bir həftəlik intensiv hazırlıq keçməsini tələb edib. Bəzi şəhərlərə mütəxəssislər nümayişlərin bütün müddəti üçün xüsusi olaraq gətiriliblər.
Travis Skott qədim yunan aedini canlandırıb
Amerikalı reper Travis Skott filmdə aed - tamaşaçılar qarşısında epik əsərlər ifa edən qədim yunan müğənnisi və hekayəçisini canlandırıb.
Nolan reperi "Odisseya"nın şifahi ənənəsini vurğulamaq üçün seçdiyini bildirib. Rejissor qədim şifahi epik poeziyanı müasir rep mədəniyyətinin analoqu kimi qiymətləndirib.
Film üçün 17,7 kilometr plyonkadan istifadə olunub
"Odisseya"nın hər bir IMAX 70 mm nüsxəsi təxminən 11 mil, yəni 17,7 kilometr uzunluğunda plyonkadan ibarətdir.
Müqayisə üçün, 1,8 metr boyunda Kristofer Nolanları bir-birinin üstünə düzmək mümkün olsaydı, bu uzunluğa çatmaq üçün təxminən 9 800 Nolan lazım gələrdi. Plyonkanın uzunluğu, həmçinin təxminən 54 Eyfel qülləsinin hündürlüyünə bərabərdir.
