Müğənni Röyanın həyatından bəhs edən roman çap edilib.
Oxu.Az xəbər verir ki, yazıçının yaxın dostu Qan Turalının Qafqazinfo-ya verdiyi məlumata görə, Cavid Zeynallının “Leyla” romanında müğənni Röya Ayxanın həyatının hamıya bəlli olan tərəfləri açıqlandığı kimi, müğənninin həyatındakı gizli məqamlar da yer alıb:
Qəhrəmanın adı da Leyla Ayxandır. Romanda Röyanın məşhurluqdan əvvəlki ağır və keşməkeşli illəri təsvir olunub.
Röyanın atasız böyüməsindən, ingilis dili müəlliməsi olan anasının qulluqçuluq edib onları saxlamasından, anasının onu quru çörək dalınca göndərməsindən, “W-Trio” günlərində yaşadığı əzablardan, gecələməyə yer tapmayıb restoranlarda yatmasından, “Bakı payızı” müsabiqəsində qələbə qazanmağından bəhs edən roman müğənninin efir qadağasından sonra qarşılaşdığı hadisələr əks etdirilib.
Yazıçı müğənni Röyanın dostları, məktəb və İncəsənət Universitetindəki yoldaşları ilə görüşərək müğənninin həyatı ilə bağlı heç kimə məlum olmayan faktları toplayaraq onları bədiiləşdirib. Röyanın bəstəkarla tələbəlik illərində yaşadığı eşq də geniş şəkildə göstərilib.
Şou-biznesi idarə edən gizli mafiyanın Röya ilə xüsusi amansızlıqla rəftarı romanda sənədlər əsasında sübut edilib.
Röya Ayxanın özündən xəbərsiz yazılan bu romanına necə reaksiya verəcəyi hələ bəlli deyil.
“Hədəf” nəşriyyatında çap olunan romanın redaktoru Etimad Başkeçiddir. Qeyd edək ki, “Leyla” yazıçının sayca ikinci romanıdır. Cavid Zeynallının ilk romanı “Günəşi gözləyənlər” 2010-cu ildə işıq üzü görüb.
