Tanınmışlardan “Qarabağ”ın bugünkü oyununa - PROQNOZ

“Qarabağ” Avropa Liqasının qrup mərhələsinin 4-cü turunda bu gün Bakıda Ukraynanın “Dnepr” komandası ilə oynayacaq.

Oxu.Az İnformasiya Agentliyi tanınmışların bugünkü oyunla bağlı proqnozlarını öyrənib.

Müğənni Əlikram Bayramov:

“Hesab 1:1 ilə nəticələnəcək. “Dnepr” o qədər də yaxşı oyun nümayiş etdirmir.

Aktyor Elməddin Cəfərov həmişəki kimi zarafatyana cavab verir:

“Oyunun gedişində nələr baş verəcəksə, söyləyə bilərəm. Birinci qolu bizimkilər vuracaq. İkincisi ukraynalılardan gələcək. İkinci hissənin təxminən 70-ci dəqiqəsində növbəti qolu “Qarabağ” vuracaq. Beləliklə, maç 2:1 hesabı ilə başa çatacaq”.

Stilist Anar Ağakişiyev:

“Mən ümumiyyətlə, “Qarabağ”a azarkeşlik edirəm. Amma həmişə ümidlərimi doğrultmur. Mənim iki variantım var: matç ya 1:1, ya da 2:1 ilə sona çatacaq”.

Aşıq Telli Borçalı:

“Mən futbolu sevirəm. Bir dəfə səhv etmirəmsə, “Milan”-“Qalatasaray” oyununa baxırdım. Matçın sonu yaxınlaşır, amma bir qol da vurulmamışdı. Gecə saat 3 idi. Sonda “Milan” bir qol vura bildi, mən “ura” deyib qışqırmağa başladım. Səhəri gün qonşu qadınla rastlaşanda o məndən soruşdu ki, dünən gecə sizdə nə olmuşdu? Yaman qışqırıqlar gəlirdi... Dedim ki, futbola baxırdım.

Odur ki, saat neçə olursa olsun mən futbolu həmişə izləyirəm. Düşünürəm ki, “Qarabağ”-“Dnepr” oyunu 2:0 ilə nəticələnəcək”.

Meyxanaçı Kərim:

““Qarabağ” ümidverici oyun nümayiş etdirmir. Hesab edirəm ki, matç heç-heçə ilə başa çatacaq”.

Müğənni Ayaz Qasımov:

“Mən futbol azarkeşi deyiləm və matçları izləmirəm. Amma hər halda “Qarabağ”ı dəstəkləyirəm”.

Aparıcı Şəhriyar Əbilov:

“Mənim fikrimcə, “Qarabağ” Kiyevi 2:1 ilə yola salacaq”.

Qeyd edək ki, “Qarabağ” (Azərbaycan) - “Dnepr” (Ukrayna) matçı bu gün saat 21:00-da Tofiq Bəhramov adına Respublika stadionunda keçiriləcək. Oyunu polşalı hakimlər briqadası Pavel Gil, Pyotr Sadçuk, Marçin Borkovski və Konrad Sapela idarə edəcəklər.

Aytən Sadıqzadə

www.oxu.az