"Son üç il ərzində beynəlxalq müstəvidə dekolonizasiya prosesinə ən mühüm töhfə vermiş tərəflərdən və təşkilatlardan biri məhz Bakı Təşəbbüs Qrupudur (BTQ)".
Oxu.Az xəbər verir ki, bu fikirləri BTQ-nin icraçı direktoru Abbas Abbasov "Media və dekolonizasiya: Yüksələn səslər, güclənən narrativlər" mövzusunda keçirilən beynəlxalq konfrans çərçivəsində jurnalistlərə açıqlamasında deyib.
O bildirib ki, bu fəaliyyət nəticəsində dünya ictimaiyyəti kolonial cinayətlər, kolonial siyasətin fəsadları və dekolonizasiya prosesinin gedişatı barədə daha çox maarifləndirilib:
"Bu məsələni yalnız siyasi müstəvidə deyil, beynəlxalq təşkilatlar səviyyəsində də ictimaiyyətin diqqətinə çatdırmışıq. Bu gün BMT, BMT-nin institutları, Qoşulmama Hərəkatı və digər beynəlxalq təşkilatlar dekolonizasiya ilə bağlı mühüm məsələləri gündəmə tez-tez gətirirlər".
A.Abbasov bildirib ki, bu, onların təşkilatçılığı ilə sözügedən mövzuya həsr olunan ikinci beynəlxalq konfransdır:
"İlk tədbirimiz 2024-cü ildə keçirilmişdi. Bugünkü beynəlxalq konfransda yerli və xarici media nümayəndələri iştirak edirlər. Burada fikir mübadiləsi aparılır. Düşünürəm ki, bu kimi fəaliyyət addımları gələcəkdə də dekolonizasiya prosesinə çox mühüm töhfə verəcək".
