"Türkiyədə iki dəfə danışıqlar aparıldı, lakin bu proseslər uğursuz oldu. ABŞ və Böyük Britaniya hər iki müzakirə prosesində sülhün təmin edilməsini əngəllədilər".
Bunu türkiyəli təhlükəsizlik məsələləri üzrə mütəxəssis Abdullah Ağar Türkiyənin Rusiya-Ukrayna danışıqlarındakı rolunu Oxu.Az-a şərh edərkən deyib.
ABŞ-nin hazırki prosesdə ağırlığının olduğunu vurğulayan A.Ağar bildirib:
"Onlar mövcud müharibənin yaratdığı şəraitdən necə geosiyasi fayda əldə etmək barədə düşünürlər. Bu düşüncə çərçivəsində mübarizə və maraqların toqquşması yaşanır".
Onun sözlərinə görə, xüsusilə müharibənin başlanğıcında atəşkəsə daha çox istəkli görünən Rusiya indi bu mövzuda daha könülsüzdür:
"Lakin həll ehtimalı hələ də var. Əgər Rusiya əldə etdiyi qazanclara qane olarsa, ABŞ öz maraqları baxımından məmnun olarsa və Ukrayna müharibənin yaratdığı yeni reallıq çərçivəsində uzlaşmağa razı olarsa, konkret nəticənin hasil olacağını düşünürəm. Bu, uzunmüddətli müzakirələr prosesidir. Çox iddialı cümlələr qurmamaq lazımdır, prosesi gözləyib görməliyik. Məsələn, Putinin Türkiyəyə gələcəyi deyilirdi, amma gəlmədi. Eyni şəkildə Trampın Türkiyəyə gələcəyi ilə bağlı söz-söhbətlər var idi, bu da reallaşmadı. Bu da göstərir ki, hazırda Putin və Tramp kimi adların prosesə birbaşa daxil olması ehtimalı azdır".
A.Ağar əlavə edib ki, Türkiyənin bu prosesdə yer alması son dərəcə təbiidir:
"Türkiyə üç dəniz sahili olan qlobal aktordur. Onun Rusiya-Ukrayna müharibəsi zamanı apardığı tarazlıq siyasəti son dərəcə dəyərli nəticələr verdi. Türkiyədə iki dəfə danışıqlar stolu arxasında müzakirələr aparıldı, taxıl dəhlizi Türkiyənin vasitəçiliyi ilə açıldı və əsir mübadiləsində Türkiyə çox böyük rol oynadı. Türkiyədə yenidən nüvə müzakirələri aparılıb. Xatırlayırsınızsa, həm ABŞ-nin, həm də Rusiyanın kəşfiyyat rəhbərləri Türkiyədə görüşmüşdülər.
Bütün bu prizmalardan baxıldığında, Türkiyə bu prosesdə çox mühüm rolu üzərinə götürüb. Bu hadisələr dünya ictimaiyyətinə Türkiyənin nə qədər kritik geosiyasi aktor olduğunu göstərdi. Lakin Türkiyə bu rolu öz xeyrinə konkret qazanclara çevirməlidir. Yalnız mühiti hazırlayan ölkə olmaq kifayət deyil, bu prosesdən geosiyasi qazanc əldə etmiş tərəf kimi çıxmaq vacibdir. Əminəm ki, dövlətimiz artıq bu istiqamətdə ağıllı addımlar atır", - deyə Abdullah Ağar bildirib.
Elçin Aslangil
