Fevralın 25-də ABŞ Konqresində Xocalı qətliamına həsr olunmuş xüsusi tədbir təşkil edilib.
Azərbaycanın ABŞ-dakı səfirliyindən Oxu.Az-a verilən məlumata görə, “Xocalıya Ədalət” kampaniyasına dəstək çərçivəsində keçirilən tədbirdə ABŞ konqresmenləri və Konqresin əməkdaşları, ABŞ-ın ATƏT-in Minsk Qrupundakı həmsədri Ceyms Uorlik, diplomatik korpusun üzvləri, o cümlədən Türkiyənin ABŞ-dakı səfiri Sərdar Kılıç, ABŞ-dakı Azərbaycan və türk icmaları, eləcə də yerli ictimaiyyətin nümayəndələri iştirak edib.
Çikaqo Amerika-Azərbaycan Cəmiyyətinin (Azerbaijani Center of Midwest America) prezidenti Mehriban Məmmədova çıxışında Xocalı qətliamının Azərbaycan xalqının qanlı yaddaşında buraxdığı izlərdən danışıb.
Azərbaycanın ABŞ-dakı səfiri Elin Süleymanov qətliamın doğurduğu faciəvi nəticələrdən söz açaraq bildirib ki, bu ağır qətliamın yad edilməsi əslində regionda sülhün tezliklə bərpa edilməsinin vacibliyini xatırladır.
Səfir üzləşdiyi bütün acılara və haqsızlıqlara baxmayaraq, Azərbaycanın gələcəyə baxdığını vurğulayıb və Ermənistan-Azərbaycan, Dağlıq Qarabağ münaqişəsinə həllinin uzaq olmadığına ümid etdiyini söyləyib.
ABŞ Konqresində Azərbaycan üzrə işçi qrupun həmsədri Steve Cohen, Nümayəndələr Palatasının Avropa və Avrasiya üzrə alt-komitəsinin sədri Dana Rohrabacher, konqresmenlər Henry Cuellar və Donald Payne öz nitqlərində ilk növbədə Azərbaycan torpaqlarının Ermənistan tərəfindən işğalının davam etdiyini bildirib və ABŞ tərəfindən bu münaqişənin nizamlanması üçün daha fəal səylərin göstərilməsinin vacibliyini diqqətə çatdırıblar. Konqres üzvləri hər bir insan həyatının dəyərli olduğunu göstərərək, Xocalı qurbanları arasında böyük sayda qadın və uşaqların olmasının ayrıca üzüntüyə səbəb olduğunu ifadə ediblər.
Sonda Heydər Əliyev Fondu tərəfindən hazırlanmış və Ermənistan-Azərbaycan, Dağlıq Qarabağ münaqişəsi, xüsusilə Xocalı faciəsindən bəhs edən film göstərilib.
