ABŞ və İran arasında birbaşa danışıqların növbəti raundunun yaxın günlərdə keçirilməsi gözlənilir.
Rəsmi açıqlamalarda "müsbət irəliləyiş" ifadəsi ön plana çəkilsə də, tərəflərin mövqeləri arasındakı dərin fərqlər prosesin hələ də mürəkkəb olduğunu göstərir. Pakistanın müdafiə naziri Xavaca Asifin sözlərinə görə, diplomatik səylər konstruktiv istiqamətdə davam edir. Hətta növbəti görüşün aprelin 16-da İslamabadda keçirilməsi ehtimalı da gündəmdədir.
Bu barədə Baku TV-nin videomaterialında deyilir:
Alternativ məkan kimi isə Cenevrə müzakirə olunur. Amma əsas diqqət Vaşinqtondan gələn mesajlara yönəlib.
ABŞ-nin vitse-prezidenti Ceyms Devid Vens açıqlamasında bildirib ki, Vaşinqton artıq İranda qarşıya qoyduğu məqsədlərə çatdığını düşünür və prosesin diplomatik yolla yekunlaşmasının vaxtının gəldiyini hesab edir. Bu açıqlama ilk baxışdan kompromis siqnalı kimi görünsə də, əslində, daha fərqli mənzərə ortaya qoyur. Çünki ABŞ danışıqlara paralel olaraq İrana qarşı konkret və sərt şərtlər irəli sürməkdə davam edir.
Vaşinqton Tehrandan zənginləşdirilmiş uran ehtiyatlarını tam şəkildə təhvil verməyi, uranın zənginləşdirilməsini uzunmüddətli, hətta 20 ilə qədər dayandırmağı və ən kritik məsələ kimi Hörmüz boğazını tam şəkildə gəmiçilik üçün açmağı tələb edir.
Məhz bu məqamda danışıqların mahiyyəti sual doğurur. Bu, qarşılıqlı kompromisə əsaslanan diplomatiyadır, yoxsa təzyiq altında razılaşma?
