"Ermənistan Avrasiya İqtisadi İttifaqının (Aİİ) üzvüdür və təşkilatın qaydaları "Beynəlxalq sülh və rifah üçün Tramp marşrutu" (TRIPP) layihəsinə də şamil olunacaq".
Oxu.Az xəbər verir ki, bu barədə parlamentdə jurnalistlərə açıqlamasında Ermənistan xarici işlər nazirinin müavini Mnatsakan Safaryan məlumat verib.
"Hazırda Ermənistan Aİİ-yə daxildir və bu ərazidə Aİİ-nin tranzit qaydaları qüvvədədir", - deyə o qeyd edib. Birliyin qaydalarının "TRIPP layihəsinə" də tətbiq edilib-edilməyəcəyi ilə bağlı dəqiqləşdirici suala isə nazir müavini "Bəli" cavabını verib.
Bununla yanaşı, nazir müavini Rusiyanın layihədə mümkün iştirakı ilə bağlı sualı cavablandırmaqdan çəkinərək fərziyyələr irəli sürmək istəmədiyini bildirib.
"Hazırda TRIPP Ermənistan və ABŞ tərəfindən həyata keçirilir. Müqavilə imzalanıb və hazırda icra mərhələsindədir. Gələcəklə bağlı hər hansı fərziyyə irəli sürmək və ya açıqlama vermək istəməzdim", - deyə diplomat bildirib.
Moskvanın Ermənistan tərəfi ilə təmaslar zamanı TRIPP-də iştirak məsələsini qaldırıb-qaldırmaması ilə bağlı suala cavab olaraq, o vurğulayıb ki, bu mövzu ikitərəfli gündəlikdə yoxdur və İrəvanla Moskva arasındakı danışıqlarda müzakirə olunmayıb.
