Cəbrayıla qayıdan sakin: "Ən böyük arzum sülh içində yaşamaqdır"

"Ən böyük arzum bundan sonrakı ömrümü Cəbrayılda, sülh, əmin-amanlıq içində yaşamaqdır".

Bunu Oxu.Az-a açıqlamasında bu gün Cəbrayıl şəhərinə köç edən keçmiş məcburi köçkün Zərifə Teymurova deyib.

O bildirib ki, illərdir, məhz bu günün həsrəti ilə yaşayıb:

"Ailəmlə, övladlarımla öz doğma yurdumuza qayıdıram. Çox sevincliyəm. Ailəmlə Cəbrayılda ən birinci yaxınlarımızın, doğmalarımızın məzarını ziyarət edəcəyik. Həmişə arzulamışam ki, kaş qayıdardıq torpaqlarımıza, gedib qəbiristanlığa atamın, anamın məzarını ziyarət edərdim. Şükür ki, bu günü görmək mənə nəsib oldu.

Bu günləri bizə yaşatdığı üçün Ali Baş Komandanımıza, müzəffər Ordumuza minnətdarıq. Allah şəhidlərimizə rəhmət eləsin, qazilərimizə cansağlığı versin!"

Xatırladaq ki, bu gün növbəti köç karvanı Cəbrayıl şəhərinə yola salınır. Bu mərhələdə daha 37 ailə (212 nəfər) öz doğma yurduna köçürülür.

Qeyd edək ki, hazırda Qarabağda və Şərqi Zəngəzurda, oraya köçürülən keçmiş məcburi köçkünlərlə yanaşı, bu bölgədə aparılan layihələrin icrasında çalışan, həmçinin ayrı-ayrı dövlət qurumlarının yerli bölmələrində xidməti vəzifələrini yerinə yetirən, yenidən fəaliyyətə başlamış səhiyyə, təhsil, mədəniyyət, turizm, sənaye, energetika müəssisələrində işləyən, ümumilikdə, 40 minə yaxın insan yaşayır.

Cəbrayıla qayıdan sakin: "Ən böyük arzum sülh içində yaşamaqdır"

Rövşən Əsədov