30 il əvvəl itkin düşmüş minlərlə insanın ağrı və iztirablarını dünyaya çatdırmaq üçün Cenevrəyə toplaşan azərbaycanlı qadınların keçirdiyi aksiya şəhərin sakinləri və turistlər üçün gözlənilməz hadisə olub.
Oxu.Az "Report"a istinadən xəbər verir ki, "Qarabağ İtkin Ailələri" İctimai Birliyinin təşkil etdiyi aksiyanın məqsədi talelərin aydınlaşdırılması üçün cavabdehlik daşıyan beynəlxalq təşkilatların məsuliyyətini xatırlatmaq və ümidlərin hələ də tükənmədiyini göstərməkdir.
Aksiya Cenevrədə BMT-nin Avropa ofisinin qarşısındakı "Millətlər sarayı" meydanında, məşhur "Sınıq stul" abidəsi önündə keçirilib. Bu abidə 1993-cü ildə yalnız üç ay üçün quraşdırılsa da, illərdir şəhərin əsas simvollarından biri kimi qalır və piyada əleyhinə minalara, kaset bombalarına qarşı mübarizəyə həsr olunub. Bu gün isə abidə bütün müharibə qurbanlarının, o cümlədən itkin düşənlərin xatirəsini simvolizə edir.
30 avqust - Beynəlxalq Məcburi Yoxaçıxma Qurbanları (itkin düşmüş şəxslər) Günü münasibətilə keçirilən aksiyada azərbaycanlı qadınlar əllərində 30 ildən artıqdır evlərinə qayıtmayan yaxınlarının fotolarını və onlara aid şəxsi əşyaları olan qutuları tutaraq susqun şəkildə oturublar. Ermənistanın Azərbaycana qarşı hərbi təcavüzü nəticəsində 4 minə yaxın insanın itkin düşməsi bu faciənin əsas səbəbidir.
Meydana toplaşan ziyarətçilər fotolara baxıb, video və şəkillər çəkib, məlumat vərəqləri ilə tanış olublar. Onların çoxu baş verənlərdən sarsıldığını və kədərləndiyini bildirib.
Fransadan gələn Eliz özlərinin də zorakılıq və qətliamlarla üzləşdiklərini deyərək bu ağrını başa düşdüyünü vurğulayıb.
Kanadadan gələn Culi gördüklərinin onu dərin təsirləndirdiyini, məsələyə daha yaxından maraq göstərəcəyini qeyd edib.
Hindəsilli kanadalı Maraş və həyat yoldaşı isə qadınlarla söhbət edərək hadisəni çox kədərləndirici adlandırıblar. Onun həyat yoldaşı Enci deyib:
"Bir çox münaqişələrin kökündə din dayanır. İnsanlar dini müzakirə etməyə başlayanda problemlər yaranır. Amma bu cür vəhşilikləri ermənilərdən gözləmirdim. Siz sülhə doğru gedirsiniz, elə deyilmi? Ümid edirəm, tezliklə sülh əldə olunar".
