Deputat: "Qərb Ukrayna ssenarisini Gürcüstanda həyata keçirə bilməyəcək"

Gürcüstanı öz nəzarətində saxlamaq uğrunda Qərb və Rusiya arasında gedən mübarizə hazırda da davam edir. Ölkədə intensiv xarakter alan iğtişaşlar da bunun bariz nümunəsidir. Təbii ki, ilk növbədə Gürcüstanda baş verən proseslər gürcü xalqını maraqlandırır və seçim də onlarındır. Ona görə də Qərb xalqın seçiminə hörmətlə yanaşmalı, ölkənin daxili işlərinə müdaxilə etməməlidir. Bütün bunların fonunda gürcü xalqı da hər şeydən əvvəl tarixin bu təlatümlü mərhələsində müdriklik nümayiş etdirməli, heç bir xarici qüvvənin əlində alət olmamalı və xalqın maraqlarını hər şeydən üstün tutmalıdır. Çünki Qərbin Gürcüstanla bağlı ssenarisi bu ölkəni öz maraqları naminə növbəti Ukrayna etmək, daha doğrusu qurban vermək cəhdidir. Qərb Ukrayna xalqını müharibəyə sürüklədiyi kimi, indi də eyni ssenarini Gürcüstan üçün yazır.

Mövzunu Oxu.Az-a şərh edən Milli Məclisin deputatı Azər Badamovun sözlərinə görə, Gürcüstan özünün çətin dövrünü yaşayır:

"Çünki xalq şəffaf şəkildə öz nümayəndələrini seçsə də, Qərb bununla razılaşa bilmir. Ona görə də siyasi texnoloqların köməyi ilə ölkədə siyasi sabitliyi pozub ənənəvi niyyətinə nail olmağa çalışır. Gürcü xalqı parlament seçkisində öz sözünü deyib. Artıq yeni hökumət formalaşıb və yeni prezidentin seçilməsi ərəfəsidir. Amma Salome Zurabişvilinin rəhbərliyi altında formalaşmış hökuməti tanımamağa, parlament seçkisinin yenidən keçirilməsinə çağırışlar olunur. Hətta Zurabişvili parlament yenidən seçilənə qədər prezidentlik postunu tərk etməyəcəyi ilə bağlı bəyanatlar da səsləndirir. Bu isə ondan xəbər verir ki, Qərbin istəyi Gürcüstanı da Ukraynanın durumuna salmağa hesablanıb".

"Qərbin dəstəklədiyi Ukrayna müstəqil respublika kimi məhv olmaq təhlükəsi ilə üz-üzədir. Hətta Ukraynanın Qərb ölkələri arasında bölüşdürülməsi planları da artıq gizlədilmir. Cənubi Qafqazda isə Gürcüstan üzərində həmin ssenarinin davam etdirilməsində qərarlı olan Qərb, bu ölkəyə yeni sanksiyaların tətbiq olunacağını, Avropa İttifaqına yolunun bağlanacağını, maliyyə yardımlarını dayandıracağını və s. hədələrlə hökumətə təzyiq göstərməyə davam edir. Baş nazir Kobaxidzenin buna cavabı isə gecikmədi və o, 2028-ci ilə qədər Avropa İttifaqına inteqrasiyasını dayandırdığını və Qərbin qrantlarından imtina etdiyini bəyan etdi. Qərb isə Gürcüstandan əl çəkmək istəmir və insanları hakimiyyətə qarşı qaldırmağa davam edir. Təbii ki, Qərbin iradəsinə tabe olan ölkələri yaxşı heç nə gözləmədiyi artıq sübut olunub. Qərb hansı ölkəyə daxil olsa, o ölkə ərazilərini itirir, sabitliyi pozulur, dövlət olaraq zəifləyir və demək olar ki, müstəqilliyini itirmək təhlükəsi ilə üzləşir. Bu gün Gürcüstan da belə bir təhlükə ilə üzləşib", - deyə deputat vurğulayıb.

Müsahibimiz əlavə edib ki, bütün bunlara baxmayaraq, müdrik gürcü xalqı Qərbin vəd etdiyi boş xəyalların arxasınca getməyərək, özünün seçdiyi hökumətin yanında olacaq:

"İnanıram ki, Qərbin siyasi texnoloqlarının qurduğu ssenari uzun müddət davam etməyəcək. Belə ki, 14 dekabrda Gürcüstanın yeni prezidenti seçiləcək və ictimai - siyasi sabitliyi pozmağa çalışanlara qarşı ciddi tədbirlər görüləcək. Çünki Gürcüstan xalqı özünün müstəqilliyini qoruyub saxlamalı və Qərbin çirkin planlarının qurbanına çevrilməyərək onların ssenarilərinin Cənubi Qafqazda genişlənməsinə imkan verməməlidir".

Deputat Vüqar İskəndərov da Oxu.Az-a açıqlamasında gürcü xalqının növbəti imtahan qarşısında olduğunu deyib:

"Lakin onlar bu çətinlikdən ləyaqətlə çıxacaqlar. Çünki Gürcüstan xalqı da, hakimiyyəti də başa düşür ki, Qərbin onlara bu günə qədər söz verdiyi bir çox məsələlər yalnız sözdən və siyasi manipulyasiyadan ibarət olub. Gürcüstan illər əvvəl sabiq prezident Mixail Saakaşvilinin hakimiyyəti dövründə məhz Qərbə sığınaraq iki böyük ərazisini itirdi, növbəti illərdə isə müxtəlif vədlər verməklə Gürcüstanın müstəqil siyasət həyata keçirməsinə Qərb təsisatları hər vəchlə mane olmağa çalışdı. Lakin gürcü xalqı artıq həqiqətin necə olduğunu çox yaxşı anlayır, hakimiyyət də milli maraqlara söykənən siyasətə sadiq olduğunu ortaya qoyur".

"Gürcü xalqı artıq öz hakimiyyətini, öz parlamentini seçib və yalnız özünün maraqlarına, dövlətçilik ənənələrinə sadiq siyasətlə inkişaf etmək yolu tutub. Təəssüflər olsun ki, bu, Qərbə sərf etmədiyi üçün xüsusilə də ABŞ və Avropa İttifaqı bütün rıçaqlarını işə salaraq Gürcüstanda vətəndaş qarşıdurması yaratmağa, bununla da hakimiyyəti devirib özünü istədiyi marionet qüvvələri hakimiyyətə gətirməyə çalışır. Lakin əminik ki, bu hadisələrin nəticəsi gürcü xalqının istəyinə uyğun olacaq və Qərb Ukraynada hazırladığı ssenarini Gürcüstanda həyata keçirə bilməyəcək".

Mərahim Nəsib