Saysız-hesabsız problemlər içərisində boğulan, üstəlik yeni, daha dağıdıcı müharibə təhlükəsi ilə üz-üzə qalan İranda artıq bir neçə həftədir Azərbaycan məktəblərindəki vahid geyim məsələsi gündəmdə saxlanılır.
Oxu.Az xəbər verir ki, bu barədə "Azad İran" özünün "YouTube" kanalında videosüjet yayımlayıb.
Süjetdə bildirilir ki, İranın elm, tədqiqat və texnologiya naziri Hüseyn Simayi Sərraf ötən həftə yaydığı videomüraciətində Azərbaycanda guya hicaba görə təhsildən kənarda qalan tələbə və məktəbli qızları oxumaq üçün İrana dəvət edib.
"Mən İran İslam Respublikasının elm naziri kimi elan edirəm ki, İran universitetlərinin qapıları Azərbaycandan olan qızların üzünə açıqdır. Biz islam peyğəmbərinə iman gətirən və təhsil hüququndan istifadə etmək üçün hicabı tərk etməyə məcbur olan qızlar üçün yaxşı ev sahibi ola bilərik" - deyə, Hüseyn Simayi bildirib.
İranlı nazirin tutduğu vəzifənin məsuliyyətinə və dövlətlərarası münasibətlər çərçivəsinə sığmayan bu çağırışına ilk cavab elə İranın özündə yaşayan azərbaycanlılar tərəfindən verilib.
Belə ki, Güney Azərbaycandan olan tanınmış sosial media fəalı Hüseyn Simayinin açıqlamasına cəsarətli münasibət sərgiləyərək nazirə müraciətlə deyib:
"Cənab nazir, Azərbaycan qızları burada hansı dildə təhsil alacaqlar? Yüz ildir ki, biz İran Azərbaycanında ana dilində təhsil almaq imkanından məhrumuq. İndi ki, o tay Azərbaycanın qızlarını burda oxumağa dəvət edirsiniz, mənə deyin görüm, onlara türk dilində məktəb hazırlayacaqsınız? Siz türk dilində məktəb təşkil etmək imkanına maliksinizsə, niyə bu əlli ildə İran vətəndaşı olan azərbaycanlılar üçün belə bir məktəb açmamısınız?"
"Azad İran"ın videomaterialında qeyd olunur ki, bu sözlər təkcə İranda Güney Azərbaycan türklərinin ana dilində təhsil hüququndan məhrum edilməsi kimi acı reallığı ortaya qoymur, həm də iranlı nazirin çağırışındakı məkrli niyyətin üzərinə işıq salır.
Qeyd edək ki, Bakının reaksiyası da özünü çox gözlətməyib. Oktyabrın 26-da Azərbaycan Respublikasının Elm və Təhsil Nazirliyi İranın Elm, Tədqiqat və Texnologiya naziri Hüseyn Simayi Sərrafın müraciəti ilə əlaqədar açıqlama yayıb.
Açıqlamada İranlı nazirin sözləri tamamilə yersiz adlandırılaraq deyilib:
"İran rəsmilərinə tövsiyə edərdik ki, başqa ölkələrin daxili işlərinə müdaxilə etmək əvəzinə öz ölkələrinin problemləri ilə məşğul olsunlar".
