"Hazırda çox həssas bir dövrdən keçirik. Bu dövrdə diqqətli olmalıyıq. Bölgəmizdə böyük bir dəyişiklik baş verir. Türkiyə-Azərbaycan münasibətləri isə regional sülh və sabitlik üçün bir sığorta rolunu oynayır. Bu münasibətlər təkcə Türkiyə və Azərbaycan üçün deyil, bütün türk dövlətləri, regionumuz və hətta dünya sülhü üçün mühüm əhəmiyyət daşıyır".
Bu sözləri Oxu.Az-a açıqlamasında Türkiyənin Azərbaycandakı səfirliyinin media müşaviri Alptekin Cihangir İşbilir Azərbaycanla Türkiyə arasında müttəfiqlik münasibətlərinə xələl gətirməyə yönələn dezinformasiyalarla bağlı deyib.
Onun sözlərinə görə, belə bir həssas dövrdə bu münasibətləri pozmaq məqsədilə dezinformasiya xarakterli materiallarla tez-tez qarşılaşırıq:
"Hətta təsəvvür belə edə bilməyəcəyimiz dərəcədə reallığa yaxın dezinformasiyalar yayıla bilir. Buna görə də ayıq-sayıq olmağımız vacibdir. İstər sosial mediada, istərsə də digər media qurumlarında yayılan bu cür dezinformasiya xarakterli məlumatlarla qarşılaşdıqda onları mütləq şəkildə yoxlayaraq ona uyğun hərəkət etmək lazımdır ki, bədniyyətli tərəflərə fürsət verməyək. Biz Türkiyə Prezident Administrasiyasının Kommunikasiya İdarəsi olaraq Azərbaycan Media İnkişaf Agentliyi və azərbaycanlı media nümayəndəsi olan dostlarımızla bu mövzuda çox sıx əməkdaşlıq edirik".
Mərahim Nəsib
