"Xəzər dənizində suyun səviyyəsinin 29 metrə qədər enməsi hələ ki ekoloji fəlakət demək deyil, lakin vəziyyət ciddi diqqət tələb edir".
Oxu.Az-ın News.ru-ya istinadla verdiyi məlumata görə, bu barədə ekologiya üzrə rusiyalı ekspert İrina Qolovaçova məlumat verib.
Onun sözlərinə görə, bu, təbii və dövri xarakter daşıyan bir prosesdir.
"Xəzər dənizi əvvəllər də suyun səviyyəsinin həm azalması, həm də artması dövrlərini yaşayıb. Bu, təbiətin özündə baş verən dövri dəyişikliklərdir. Amma bu proseslərə insan faktorunun - antropogen təsirlərin də əlavə olunması neqativ nəticələri daha da dərinləşdirə bilər", - deyə o bildirib.
Ekspert qeyd edib ki, Xəzərlə bağlı problemlər yalnız ekologiyanı deyil, həm də iqtisadiyyatı, sosial sahəni və kənd təsərrüfatını əhatə edir. Bu səbəbdən də məsələyə kompleks yanaşma vacibdir.
Xatırladaq ki, daha əvvəl Qazaxıstanın Mangistau vilayətində, Xəzərin sahilində yerləşən Fort-Şevçenko şəhəri yaxınlığında aparılan reyd zamanı 100-dən çox ölü suiti cəsədi aşkarlanmışdı. Yerli hakimiyyət orqanlarının verdiyi məlumata görə, heyvan cəsədləri ciddi şəkildə parçalanmış və dağılmış vəziyyətdə olub.
