Nazirlikdən vəd: Bu məktəbə istilik veriləcək

Paytaxtın Yasamal rayonu ərazisində yerləşən 175 saylı orta məktəb hələ də yay rejimi ilə çalışır.

Oxu.Az Ölkə.az-a istinadən xəbər verir ki, hazırda sözügedən məktəbin qazanxanası və istilik sistemləri çalışmır.

Sinif otaqlarının soyuq olmasından nəinki şagirdlər, hətta məktəb müəllimləri də şikayətlənir. Şikayətlərə baxmayaraq, problem həllini tapmayıb. 175 saylı orta məktəbin şagirdləri havalar soyuq keçən günlər dərsləri yarımçıq qoyub, evə getməli olurlar.

Məsələ ilə bağlı Təhsil Nazirliyinin mətbuat xidmətindən bildirilib ki, artıq sözügedən məktəbdə istilik problemi həllini tapıb.

“Bu gündən etibarən 175 saylı məktəbdə istilik verilişi bərpa olunub. Artıq problem həllini tapıb”, - deyə Təhsil Nazirliyindən bildirilib.

Qeyd edək ki, 175 saylı məktəbin rəhbərliyi məktəbdə istilik probleminin yaranmasını Yasamal rayonuna yeni icra başçısının təyin edilməməsi ilə əlaqələndirib.

A.M.

www.oxu.az