AzTV AMEA-ya cavab verdi - YENİLƏNİB + VİDEO

Azərbaycan Televiziyası AMEA ilə arasındakı süjet qalmaqalı ilə bağlı məlumat yayıb.

Məlumatda deyilir:

“Məsələ ilə bağlı AMEA bildirir ki, dövlət qurumlarının sürətlə modernləşdiyi, idarəetmə sahəsində yeni innovativ mexanizmlərin bütün sahələrdə tətbiq olunduğu, kadr potensialından daha səmərəli istifadə ilə bağlı kompleks tədbirlərin həyata keçirildiyi hazırkı şəraitdə yuxarıda qeyd olunan istiqamətlər üzrə dövlət qurumlarının, o cümlədən AMEA-nın fəaliyyətində rast gəlinən nöqsanların obyektiv olaraq kütləvi informasiya vasitələrində əks olunması mövcud problemlərin müəyyənləşdirilməsi və aradan qaldırılması baxımından əhəmiyyətlidir.

Onu da qeyd etmək istərdik ki, haqqında söhbət gedən süjetdə səsləndirilən iradlar bütövlükdə öz işinə vicdanla yanaşan, bütün ömrünü olduqca ağır və şərəfli bir fəaliyyətə, elmə həsr edən, elmin bu və ya digər sahəsinin inkişafına öz araşdırmaları ilə mühüm töhfələr verən, kütləvi informasiya vasitələrində, o cümlədən Azərbaycan Televiziyasında elmin təbliği və populyarlaşdırılması sahəsində uğurla fəaliyyət göstərən Akademiya əməkdaşlarını və bütövlükdə elmi ictimaiyyəti yeni yanaşmalara sövq edir”.

13:30

AMEA-nın prezidenti vəzifələrini rica edən Arif Həşimov AzTV-nin akademiya barədə tənqidi süjetinin qurumun rəsmi saytında yerləşdirilməsi məsələsinə münasibət bildirib.

A.Həşimov Manset.az-a açıqlamasında qeyd edib ki, bu, onun tapşırığı ilə edilib:

“AzTV-nin AMEA haqqında verdiyi süjet mənim tapşırığımla akademiyanın saytına qoyulub. Biz akademiya olaraq tənqidə hazırıq. Hesab edirəm ki, hər kəs tənqidə açıq olmalıdır. Süjetdə haqlı tərəflər də var, haqsız tərəflər də.

Hazırda yay vaxtı olduğu üçün bir çox əməkdaşlarımız məzuniyyətdədirlər. Digər tərəfdən, yaradıcı insanlara saat rejimi qoymaq olmaz. Mən özüm və digər institut direktorları saat 8-9 qədər AMEA-da oluruq. Belə yanaşma düzgün deyil. Bəlkə, özündənrazılıq kimi qiymətləndirilə bilər, ancaq mənə kimsə AMEA-nın nə daxili, nə xarici işini, ümumən iş prinsiplərini öyrədə bilməz. Bundan əvvəlki AMEA prezidentlərinin zamanında bütün bu işləri mən görmüşəm”.

A.Həşimov yaşlı alimlərin gənclərə dəstək olmaması barədə fikirlərə də münasibət bildirib:

“Yaşlı alimlərimizin, xüsusən akademiklərin gənc nəslə dəstəyinə gəlincə, diqqətlə baxsaq, görərik ki, hər birinin nə qədər fəlsəfə doktorlarının, elmlər namizədinin yetişməsində, dərəcə almasında rolu olub. Mənim özümün 25-ə yaxın elmlər namizədinə dəstəyim var. 2002-ci ildə Fizika İnstitutunun direktoru olanda 200-ə yaxın gənci işə götürmüşəm. Tənqidi qəbul etmək və nəticə çıxarmaq lazımdır”. 

Qeyd edək ki, AzTV-nin AMEA haqqında hazırladığı tənqidi süjetin akademiyanın saytında və səhifəsində yerləşdirilməsi müzakirələrə səbəb olub.

11:20

Azərbaycan Milli Elmlər Akademiyası Azərbaycan Televiziyasının (AzTV) qurumun fəaliyyəti barədə hazırladığı tənqidi süjetə münasibət bildirib.

AMEA-nın Rəyasət Heyətinin mətbuat katibi Azadə Balayeva Oxu.Az-ın sorğusuna cavab olaraq bildirib ki, elm müəssisəsində iş qrafiki fərqli ola bilər:

“Bura avadanlıq hazırlayan zavod deyil ki, standart saatda işdə olasan. Yəni AMEA-nın iş qrafikini zavodla eyniləşdirmək olmaz. “Mən 15 dəqiqədir buradayam, insanlar çıxmadı, işə gəlmir, işləmir” kimi fikirləri səsləndirməyi doğru hesab etmirəm. İşçilərdən kimsə deməyib ki, biz bu saatda getmişik. Nəyisə deyəndə faktlar olmalıdır. Bura elm ocağıdır və iş qrafiki fərqlidir”.

O qeyd edib ki, hazırda AMEA əməkdaşlarının əksəriyyəti məzuniyyətdədir:

“Binanın digər qapısı da var. İşçilər oradan da çıxıb gedirlər”.

Qeyd edək ki, Azərbaycan Televiziyası (AzTV) Azərbaycan Milli Elmlər Akademiyasının fəaliyyəti barədə süjet hazırlayıb. 

“Qocaman elm ocağında qocalaşma prosesi: AMEA-da işçilərin yaşından başqa heç nə dəyişməyib” adlı süjetdə qurumun fəaliyyəti sərt şəkildə tənqid edilib. 

İlhamə Əbülfət