Yan
2023
18:50
75
1141
40507
Virtual karabakh

Bakıdakı dəhşətli qəzada iştirak edən sürücülərin kimliyi BİLİNDİ - YENİLƏNİB + FOTO/VİDEO

3 Yan, 2023
18:50
40507

Bakıdakı dəhşətli qəzada iştirak edən sürücülərin kimliyi BİLİNDİ - YENİLƏNİB + FOTO/VİDEO

Bizim WhatsApp kanalımıza buradan abunə ola bilərsiniz

Bakının Qaradağ rayonunun Qobustan qəsəbəsində baş verən ağır yol-nəqliyyat hadisəsində iştirak edən sürücülərin kimliyi məlum olub.

Baş Dövlət Yol Polisi İdarəsindən Real TV-yə verilən açıqlamaya görə, Şərur rayon sakini 39 yaşlı Heydərov Nizami Qadir oğlu yanacaq daşıdığı “Mercedes” markalı qoşqulu yük avtomobili ilə Qazax rayonu istiqamətində olarkən, qarşıda onunla eyni istiqamətdə hərəkətdə olan Lənkəran rayon sakini 43 yaşlı Fərzullayev Ceyhun Cəsarət oğlunun idarəetdiyi “KamAZ” markalı yük maşını ilə toqquşub.

Toqquşmadan sonra “Mercedes” markalı yük avtomobili idarəetmədən çıxaraq yolun solundaki dəmir çəpərə çırpılıb və güclü partlayış nəticəsində alışıb.

Bu zaman eyni istiqamətdə hərəkətdə olan Füzuli şəhər sakini 59 yaşlı Əliyev Əvsələtdin Tofiq oğlunun idarə etdiyi “Opel” markalı avtomobil, “Mercedes” markalı yük avtomobilinə çırpılıb.

Qəza nəticəsində “Mercedes” markalı avtomobilin sürücüsü Heydərov Nizami Qadir oğlu hadisə yerində yanaraq ölüb, “Opel” markalı avtomobilin sürücüsü Əliyev Əvsələtdin Tofiq oğlu isə xəsarət alıb.

17:55

Bakının Qaradağ rayonunun Qobustan qəsəbəsində ağır yol qəzası ilə bağlı cinayət işi başlanılıb, ölən sürücünün kimliyi məlum olub.

Bu barədə “Report”un sorğusuna cavab olaraq Baş Dövlət Yol Polisi İdarəsindən (BDYPİ) bildirilib.

Qeyd edilib ki, hadisə ilə bağlı Cinayət Məcəlləsinin 263.2-ci (Yol hərəkəti və nəqliyyat vasitələrinin istismarı qaydalarını pozma, ehtiyatsızlıqdan zərərçəkmiş şəxsin ölümünə səbəb olduqda) maddəsi ilə cinayət işi açılıb, istintaq aparılır.

Bildirilib ki, hadisə zamanı ölən şəxs Heydərov Nizami Qədir oğludur.

14:22

Qaradağda baş verən dəhşətli yol-nəqliyyat hadisəsinin görüntüləri yayılıb. 

Oxu.Az xəbər verir ki, görüntülərdə 99-ZD-593 dövlət nömrə nişanlı “Mercedes” markalı yanacaqdaşıyan avtomobilin yolun kənarı ilə hərəkətdə olan 42-CB-514 dövlət nömrə nişanlı “KamAZ” markalı yük maşınına çırpılması əks olunub. 

Zərbənin təsirindən yanacaqdaşıyan yük maşını yol kənarındakı dəmir arakəsmələrə çırpılıb. Bundan başqa, eyni istiqamətdə hərəkətdə olan 99-BH-926 dövlət nömrə nişanlı “Opel” markalı nəqliyyat vasitəsinin sürücüsü də qəzadan yayına bilməyib. 

Qəzadan sonra ərazidə güclü yanğın başlayıb. 

Həmin görüntüləri təqdim edirik:

Samir İsayev

12:27

“Yanğın 80 dəqiqəyə söndürülüb”.

Bunu Oxu.Az-a açıqlamasında Fövqəladə Hallar Nazirliyinin (FHN) Dövlət Yanğından Mühafizə Xidmətinin rəis müavini polkovnik Əkbər Novruzov deyib.

Onun sözlərinə görə, əraziyə 12 texnika və 65 şəxsi heyət cəlb olunub.

“Məlumat daxil olan kimi yanğın bölmələri hadisə yerinə cəlb olunub.

Yanğının baş verməsinə səbəb 99-ZD-593 dövlət nömrə nişanlı “Mercedes” markalı yanacaqdaşıyan avtomobilin hərəkətdə olan 42-CB-514 dövlət nömrə nişanlı “KamAZ” markalı yük maşını ilə toqquşmasıdır. Bu toqquşmadan sonra 99-BH-926 dövlət nömrə nişanlı “Opel” markalı nəqliyyat vasitəsi “Mercedes”ə çırpılıb”.

Ə.Novruzov qeyd edib ki, hadisədən sonra “Mercedes” markalı avtomobilin sürücüsü partlayış nəticəsində dünyasını dəyişib:

“Opel” tamamilə kül olub. Avtomobildə olan 2 nəfər şəhər xəstəxanasına aparılıb. “KamAZ”ın arxa təkərləri yanıb. Sürücüsü ilə bağlı məlumat yoxdur”.

Daha çox şəkil burada: PhotoStock.az

Nəzrin Vahid

11:56

Səhər saatlarında Bakı şəhəri, Qaradağ rayonu, Qobustan qəsəbəsində baş vermiş dəhşətli qəzadan sonra ərazidə dəhşətli mənzərə yaranıb. 

Oxu.Az xəbər verir ki, partlayış nəticəsində 99-ZD-593 dövlət nömrə nişanlı “Mercedes” markalı yanacaq daşıyan avtomobil bir neçə hissəyə parçalanıb.

Partlayışın gücündən nəqliyyat vasitəsinin çəni kuzovundan ayrılıb. 

42-CB-514 dövlət nömrə nişanlı “KamAZ” markalı yük maşını isə daşla yüklü olduğundan qəzadan qismən az zərərlə çıxıb. Zərbənin gücündən onun daşıdığı mişar daşları yola dağılıb. 

Qəza zamanı 99-BH-926 dövlət nömrə nişanlı “Opel” markalı nəqliyyat vasitəsi tamamilə kül olub. 

10:12

Bu gün səhər saatlarında Bakı şəhəri, Qaradağ rayonu, Qobustan qəsəbəsində dəhşətli qəzadan sonra baş verən yanğın söndürülüb.

Bununla bağlı Fövqəladə Hallar Nazirliyi (FHN) məlumat yayıb. 

Hadisə nəticəsində, ilkin məlumata əsasən, bir nəfər həlak olub. Yanğının söndürülməsi ilə yanaşı FHN-in qüvvələri tərəfindən hadisə yerində müvafiq təhlükəsizlik tədbirləri görülüb. 

Daxili İşlər Nazirliyindən verilən məlumata görə, qəza zamanı 99-BH-926 dövlət nömrə nişanlı “Opel”, 99-ZD-593 dövlət nömrə nişanlı “Mercedes” və 42-CB-514 dövlət nömrə nişanlı “KamAZ” markalı avtomobillər toqquşub. 

Qəza nəticəsində “Mercedes”in sürücüsü həyatını itirib.

Faktla bağlı araşdırma aparılır.

09:52

Baş Dövlət Yol Polisi İdarəsi Qobustandakı dəhşətli qəza ilə bağlı yeni məlumat yayıb. 

Qurumdan bildirilib ki, hadisə bu gün səhər 08:20-də Bakı-Qazax yolunun 55 kilometrliyində qeydə alınıb. 

Hadisə zamanı biri yanacaqdaşıyan maşın olmaqla üç avtomobil toqquşub. 

Qəzadan sonra yanğın başlayıb. 

Hazırda DYP əməkdaşları yolda təhlükəsizliyi təmin edərək hərəkətin nizamlanmasını həyata keçirirlər. 

Hadisə barədə ətraflı məlumat veriləcək.

09:09

Qobustanda “KamAZ” markalı yük maşını yanacaqdaşıyan avtomobillə toqquşub.

Daxili İşlər Nazirliyinin mətbuat xidmətindən bildirilib ki, qəza nəticəsində yanacaqdaşıyan avtomobildə olan yanacaq dağılıb və yanğın başlayıb.

Yoldan keçən bir neçə avtomobil yanıb. Hadisə nəticəsində bir nəfər ölüb.

Hazırda Daxili İşlər Nazirliyinin və Fövqəladə Hallar Nazirliyinin əməkdaşları hadisə yerindədir.

Fövqəladə Hallar Nazirliyindən (FHN) bildirilib ki, nazirliyin “112” qaynar telefon xəttinə Bakı şəhəri, Qaradağ rayonu, Qobustan qəsəbəsində yanacaqdaşıyan avtomobilin yanması barədə ilkin məlumat daxil olub.

Məlumatla əlaqədar FHN-in Dövlət Yanğından Mühafizə Xidmətinin və Xüsusi Riskli Xilasetmə Xidmətinin müvafiq qüvvələri çağırış üzrə cəlb olunub.

Yanğının söndürülməsi istiqamətində iş aparılır.

Ərazidə təhlükəsizlik tədbirləri görülür.

Bizimlə əlaqə saxlayın

Digər Cəmiyyət xəbərləri