"Azovda azərbaycanlıların olduğu gəmiyə dron hücumu" teqi üzrə xəbərlər
Azov dənizinin akvatoriyasında, konkret olaraq Taqanroq körfəzində mülki dəniz nəqliyyatının iştirakı ilə ciddi hadisə baş verib. Xarici ölkələrə məxsus “Natra” və “Zirkon” adlı iki yük gəmisi gecə saatlarında pilotsuz uçuş aparatlarının (PUA) hücumuna məruz qalıb.
Azərbaycan Respublikası Xarici İşlər Nazirliyinin rəsmi məlumatına görə, hücuma məruz qalan quru yük gəmiləri Azərbaycan dövlətinə məxsus olmasa da, onların heyət üzvləri arasında respublika vətəndaşları olub. Hadisə baş verən an hər iki gəminin göyərtəsində ümumilikdə 25 azərbaycanlı olub.
Dron zərbələri nəticəsində 5 Azərbaycan vətəndaşı həlak olub. Daha 3 həmvətənimiz isə müxtəlif dərəcəli xəsarətlər alıb. Yaralanan dənizçilər operativ şəkildə təxliyə edilərək Yeysk şəhər xəstəxanasına çatdırılıb və hazırda onlara zəruri tibbi və psixoloji yardım göstərilir. Azərbaycanın Xarici İşlər Nazirliyi həlak olanların ailələrinə dərin hüznlə başsağlığı verib və vətəndaşların geri qaytarılması, eləcə də onlara konsulluq dəstəyinin göstərilməsi prosesinin ciddi dövlət nəzarətində olduğunu bəyan edib.
