Roza Zərgərli

Roza Zərgərli (Roza Zərgər qızı Allahverdiyeva) 1979-cu ildə Rusiyanın Tümen vilayətinin Labıtnangi şəhərində hərbçi ailəsində dünyaya göz açıb. Gənc yaşlarından musiqiyə olan sevgisi onu Orta ixtisas musiqi məktəbinə və Musiqi Texnikumuna aparır. Burada akkordeon və fortepiano ixtisasları üzrə təhsil alan Roza xanım, 2001-2008-ci illərdə Azərbaycan Dövlət Mədəniyyət və İncəsənət Universitetinin kütləvi tədbirlər rejissorluğu ixtisasında oxuyur və 2015-ci ildə magistr səviyyəsinin "Rejissor sənətinin tarixi və nəzəriyyəsi" ixtisasını fərqlənmə diplomu ilə bitirir.

20 illik yaradıcılıq fəaliyyəti ərzində Roza Zərgərli Mingəçevir Dövlət Dram Teatrında quruluşçu rejissor kimi çalışıb, bir çox tamaşaların baş quruluşçu rejissoru olub və müxtəlif obrazları canlandırıb. Gözəl səsi və ifaçılıq məharəti ilə seçilən sənətçi, həmçinin estrada müğənnisi kimi fəaliyyət göstərib, beynəlxalq musiqi festivallarında Azərbaycanı ləyaqətlə təmsil edib.

Rejissor kimi yaradıcılığını daima təkmilləşdirən Roza Zərgərli bir sıra sənədli filmlərə quruluş verib. Onun 2002-ci ildə çəkdiyi "Qarabağnamə" filmi YUNESKO-nun dəstəyi ilə Fransada keçirilən festivalda I yerə layiq görülüb. Bundan əlavə, o, müxtəlif süjetli kliplərin ssenari müəllifi və rejissoru olub, Rusiyanın Xalq artistləri Yalla qrupu ilə duet ifa edib.

Aktrisa kimi də diqqət mərkəzində olan Roza Zərgərli 2000-ci illərin ortalarından etibarən bir çox seriallarda müxtəlif xarakterli Azərbaycan qadını obrazlarını yaradıb. O, dəfələrlə cəbhə bölgəsində olub, əsgərlərimiz qarşısında maraqlı konsert nömrələri və səhnəciklərlə çıxış edib.

20-yə qədər klip, 6 albom buraxan ifaçı-aktrisa 2014-cü ildən müxtəlif telekanallarda yayımlanan "Bakı vaxtı ilə" verilişinin aparıcısı və müəllifidir. Verilişdə Azərbaycan mədəniyyət xadimlərinin həyat və yaradıclıqları əhatə olunur.

Roza Zərgərli həm də bir neçə bioqrafik romanın müəllifidir. Onun "Sibir çiçəyi" adlı avtobioqrafik romanı 2018-ci ildə "Kaysın Kuliyev" adına ordenə layiq görülüb. O, Türksoyun Türkdilli xalqların mədəniyyət əlaqələrinin inkişafına görə medalla təltif olunub, Lermontov adına Yazıçılar İttifaqının fəxri üzvüdür və Qafqaz Biznesinin Təhsili Elmi İctimai Akademiyasının akademiki adına layiq görülüb.

Bacarıqlı pedaqoq olan Roza Zərgərli, Bakı Xoreoqrafiya Akademiyasında İncəsənət fakültəsində dərs deyir və doktorantura təhsili alır. O, "Müstəqillik dövrü Azərbaycan teatrında türkdilli xalqlar dramaturgiyasının səhnə təcəssümü" mövzusunda dissertasiya işi üzərində çalışır.

Sənətçi xeyriyyəçilik fəaliyyəti ilə də seçilir. 4 övladından 3-nü övladlığa götürən Roza Zərgərli yeni-yeni layihələr üzərində çalışır və aktrisa kimi fəaliyyətini davam etdirir.