İnsanlarda dil vasitəsilə ünsiyyət qurmaq qabiliyyətinin nə vaxt meydana gəldiyi müəyyənləşib

Massaçusets Texnologiya İnstitutunun amerikalı alimləri insanlarda dil vasitəsilə ünsiyyət qurmaq qabiliyyətinin nə vaxt meydana gəldiyini müəyyən ediblər.

Oxu.Az xəbər verir ki, bu barədə məqalə "Frontiers in Psychology" elmi jurnalında dərc edilib.

Onların qənaətincə, bu, ən azı 135 min il əvvəl baş verib. Alimlər son 18 il ərzində dərc edilmiş 15 genetik tədqiqatı təhlil ediblər. Nəticələr göstərib ki, 135 min il əvvəl erkən insan populyasiyalarının ilk coğrafi ayrılması baş verib.

Təxminən 100 min il əvvəl simvolik fəaliyyətlərin geniş yayılması başlayıb, bu da dilin aktiv istifadəsini göstərə bilər. Tədqiqatçılar hesab edirlər ki, dil əvvəlcə idrak sistemi kimi inkişaf edib, sonra isə tez bir zamanda ünsiyyət vasitəsinə çevrilib.

Bu, simvolik təfəkkürün və digər müasir insan davranış formalarının inkişafı üçün katalizator ola bilərdi.