16 milyon manatlıq qaçaqmal, Xəzərdə keçirilən əməliyyatlar - DSX aylıq məlumatları paylaşdı

Bu ilin fevral ayında Dövlət Sərhəd Xidməti tərəfindən dövlət sərhədini pоzduqlarına görə 30 nəfər saxlanılıb.

Oxu.Az xəbər verir ki, bu barədə Dövlət Sərhəd Xidmətinin Mətbuat Mərkəzi məlumat yayıb.

Bildirilib ki, onların səkkizi Azərbaycan, 10-u Pakistan, dördü Mərakeş, biri Əfqanıstan, biri Əlcəzair vətəndaşı olub. O cümlədən, altı nəfər İran vətəndaşı üç ədəd "Layner" tipli üzmə vasitəsində dövlət sərhədini pozaraq külli miqdarda narkotik vasitəni ölkə ərazisinə keçirməyə cəhd göstərərkən Daxili İşlər Nazirliyi ilə birgə keçirilmiş əməliyyat tədbirləri nəticəsində Xəzər dənizinin Azərbaycan Respublikasına mənsub bölməsində saxlanılıb.

Qanunsuz miqrasiya ilə mübarizə tədbirləri nəticəsində saxtalaşdırılmış tarix möhürü və pasportla, özgəsinə məxsus sənədlə dövlət sərhədini keçməyə cəhd göstərən doqquz nəfər saxlanılıb. Sərhəd rеjim qaydalarını pоzduqlarına görə 779 nəfər saxlanılaraq barələrində müvafiq tədbirlər görülüb.

Cinayətkarlığa qarşı mübarizə tədbirləri nəticəsində hüquq-mühafizə оrqanları tərəfindən axtarışda оlan 298 nəfər saxlanılaraq aidiyyəti оrqanlara təhvil vеrilib, ölkədən çıxışı qadağan edilmiş 397 nəfərin ölkəni tərk etməsinin, girişi qadağan olan 15 nəfərin isə ölkəyə daxil olmasının qarşısı alınıb.

Narkоtik vasitələrin qеyri-qanuni dövriyyəsinə qarşı mübarizə tədbirləri nəticəsində 155 kiloqram 193 qram narkоtik vasitə, 191 ədəd həb və 105 litr maye halında narkotik tərkibli güclü təsiredici vasitə hesab edilən maddə aşkarlanaraq dövriyyədən çıxarılıb.

Qaçaqmalçılıq fəaliyyətinə qarşı mübarizə tədbirləri nəticəsində ümumi dəyəri 16 milyon 787 min 836 manat оlan qaçaqmal, о cümlədən 20 ədəd 9 mm-lik tapança mərmisi, dərman vasitələri, spirtli içki və tütün məmulatları aşkar olunaraq götürülüb.

Dövlət sərhədlərinin еtibarlı mühafizəsinin təşkili istiqamətində tədbirlər davam еtdirilir.