2 İyul - Azərbaycan Polisi Günü münasibətilə Ağcabədidə tədbir keçirilib.
Oxu.Az xəbər verir ki, Ağcabədi Rayon İcra Hakimiyyətinin başçısı Rafil Hüseynov, rayonun hüquq-mühafizə orqanlarının rəhbərləri, Rayon Polis Şöbəsinin əməkdaşları tədbirdə iştirak ediblər.
Tədbir iştirakçıları ulu öndər Heydər Əliyevin abidəsini ziyarət edib və əziz xatirəsini ehtiramla yad ediblər.
Rəsmi tədbirdə əvvəlcə Azərbaycan Respublikasının Dövlət Himni səsləndirilib, sonra isə ulu öndərin və torpaqlarımızın azadlığı uğrunda canından keçən igid vətən oğullarının xatirəsi anılıb.
Tədbirdə Azərbaycanın daxili işlər naziri general-polkovnik Vilayət Eyvazovun 2 iyul - Azərbaycan Polisi Günü münasibətilə daxili işlər orqanlarının şəxsi heyətinə və veteranlarına ünvanlanmış təbrik məktubu səsləndirilib.
Rayon Polis Şöbəsinin rəisi polis polkovniki Knyaz Həsənov çıxışında hüquq-mühafizə orqanlarına göstərdiyi dəstəyə, diqqət və qayğıya görə dövlətimizin başçısına dərin minnətdarlığını bildirib.
O, bundan sonra da Azərbaycan Respublikasının müstəqilliyinin, dövlətçiliyinin möhkəmləndirilməsi işinə sədaqətlə xidmət edəcəklərini, vətəndaşlarımızın təhlükəsizliyinin təmin edilməsi, ictimai asayişin qorunması istiqamətində səmərəli fəaliyyət göstərəcəklərini, dövlətimizin milli strategiyasının müvəffəqiyyətlə həyata keçirilməsi və inkişafı naminə görüləcək işlərdə səy və bacarıqlarını əsirgəməyəcəklərini, polis adını şərəflə qoruyacaqlarını bildirib.
Tədbirdə Ağcəbədi Rayon İcra Hakimiyyətinin başçısı Rafil Hüseynov çıxış edərək peşə bayramları münasibətilə polis işçilərini təbrik edib və bildirib ki, uzun, tarixi və şərəfli bir yol keçmiş Azərbaycan polisi, yarandığı gündən xalqın və dövlətin mənafeyinə ləyaqətlə xidmət edərək, asayişin və təhlükəsizliyin mühafizəsi, sabitliyin və əmin-amanlığın qorunması, cinayətkarlığa qarşı mübarizə kimi məsuliyyətli vəzifələri vicdanla yerinə yetirir.
Tədbirdə çıxış edənlər peşə bayramları münasibətilə polis işçilərini təbrik edərək, xoş sözlərini bildiriblər.
Sonda xidmətində fərqlənən bir qrup polis əməkdaşları təltif olunublar.
