Kubra Məhərrəmova yazır...
İlk dəfə bu gülüşü Yeni il gecəsi gördüm. Sosial şəbəkələrdə paylaşılan fotoşəkildə bayram gecəsi növbədə olan polis əməkdaşının təbəssümü göydəki fişənglər kimi alışırdı. İncə və gözəl qıza polis forması çox yaraşmışdı. Üstəlik, bu geyimi məsum, işıqlı, parlaq və hüzur dolu bir gülüş taclandırırdı.
O vaxtdan bəri həmin fotoşəkil mənim üçün favoritə çevrilib. Bəzən bir foto uzun-uzadı hesabatlardan daha çox şey deyə bilir. O gülüşdəki səmimiyyət mənə bir daha anlatdı ki, təhlükəsizliyimizi təkcə qanunlar deyil, həm də həmin qanunların keşiyində dayanan insanların fədakarlığı təmin edir.
Biz çox vaxt onların xidmətini yalnız fövqəladə hadisələr zamanı xatırlayırıq. Ya da çətinə düşəndə polisə sığınırıq. Əslində isə onların ən böyük uğuru təhlükənin baş verməsinə imkan verməməkdir; sadəcə, biz çox vaxt bunun fərqinə varmırıq. Görünməyən o qədər gizli qəhrəmanlar var ki...
Bu gün həmin fotoya yenidən baxıram. Çünki əlahiddə bir gündür: Azərbaycan polisinin yaranmasından 108 il ötür.
O qızın çöhrəsindəki təbəssüm mənim üçün artıq sadəcə bir gülüş deyil. O, Azərbaycan polisinin xidmətə sədaqətinin, dövlətə bağlılığının və gələcəyə inamının simvoludur. Əslində, o qız çiynində bütöv bir xalqın təhlükəsizlik məsuliyyətini daşıyır. Yuxusuz gecələrin, növbətçiliklərin, ağır tapşırıqların və bəzən özündən qat-qat böyük olan öhdəliklərin ağırlığını çəkir. Amma o təbəssüm min "ulduz"a dəyər.
108 illik tarixdə polis hər iki Qarabağ müharibəsində döyüşüb, şəhidlər verib. Qarabağdakı antiterror əməliyyatlarında iştirak edib, müstəqil və suveren tariximizin yazılmasında bilavasitə pay sahibi olub. Bu münasibətlə hazırda xidmət çəkən, ehtiyatda olan və təqaüddəki hər bir polis əməkdaşını ürəkdən təbrik edir, hər birinə uğurlar arzulayıram.
Arzu edirəm ki, onların çəkdiyi zəhmət hər zaman layiqincə dəyərləndirilsin. Söhbət təkcə çiyinlərdəki "ulduz"lardan getmir. Məsələn, bu gün vətəndaşlar küçədə polis əməkdaşlarına rast gəldikdə onları təbrik etsinlər, xoş sözlərini əsirgəməsinlər. Sovet dövründən qalan, o sistemin qəsdən beyinlərə yeritdiyi süni "xalq-polis" qarşıdurması birdəfəlik silinsin. Keçmiş quruluş bu yadlığı məhz xalqları parçalamaq və idarə etmək üçün böyük siyasətin bir hissəsi kimi ortaya atmışdı.
Amma unutmayaq ki, polis də bizik, hərbçi də bizik. Hamısı öz övladlarımızdır.
O qız, bəlkə də, bu yazını heç vaxt oxumayacaq, bəlkə də, oxuyacaq. Əgər oxuyacaqsa, şəxsən onu və onun simasında bütün asayiş keşikçilərimizi bu bayram münasibətilə təbrik edirəm!
Deyirəm ki, səninlə fəxr edirəm! Ağır, gecə növbəsi çəkdiyinə baxmayaraq gülümsədiyi üçün təşəkkür edirəm! Dünyanın ən parlaq ulduzlarından daha parlaq və səmimi hissləri üçün təşəkkür edirəm.
Yeni il gecəsindəki o təbəssümün mənə bir daha sübut etdi ki, bəzən bir insan çiynindəki "ulduz"lardan daha ağır yük, qəlbində böyük bir sevgi, Vətənə xidmət andı daşıyır.
Üzünüz hər zaman gülsün, xidmətiniz asan olsun! Hər zaman güclü və qüdrətli ol, Azərbaycan polisi!
