Azərbaycanda elektrik enerjisi üzrə YENİ QİYMƏTLƏR

Azərbaycanda 2025-ci il yanvarın 2-dən bir sıra kommunal xidmətlər üzrə qiymətlər dəyişib.

Oxu.Az xəbər verir ki, bu barədə Tarif Şurası məlumat yayıb.

Məlumata görə, təbii qazın qiymət artımının elektrik enerjisinin istehsal xərclərinə təsiri və bu sahədə xidmətlərin dayanıqlılığının yüksəldilməsi zərurəti nəzərə alınaraq, elektrik enerjisi üzrə yeni tariflər müəyyənləşdirilib.

Elektrik enerjisi tarifləri bu gündən belə hesablanacaq:

Əhali üzrə aylıq istehlak həcmi:

- 200 kVts olan hissə üçün 1 kilovat-saat elektrik enerjisinin tarifi 0,4 qəpik (5%) artırılaraq 8 qəpikdən 8,4 qəpiyə;

- 200 kilovat-saatdan 300 kilovat-saatadək olan hissə üçün 1 qəpik (11,1%) artırılaraq 9 qəpikdən 10 qəpiyə;

- 300 kilovat-saatdan çox olan hissə üçün 2 qəpik (15,4%) artırılaraq 13 qəpikdən 15 qəpiyə dəyişdirilib.

1 kilovat-saat elektrik enerjisinin orta tarifi əhali üzrə 0,7 qəpik (7,8%) artırılıb.

Tarif dəyisikliyindən sonra əhali abonentlərin ortaaylıq xərcinin aşağıdakı kimi artacağı gözlənilir:

- 65% abonent üzrə - 45 qəpik,

- 20% abonent üzrə - 1 manat 33 qəpik,

- 15% abonent (daha çox istehlak edən) üzrə - 5 manat 61 qəpik.

Göründüyü kimi, əhalinin 65%-i üçün 1 kilovat-saat elektrik enerjisinin tarifi maksimum aşağı səviyyədə - 0,4 qəpik (5%) artırılır.

İstehlak malları indeksinə təsirin minimallaşdırılması məqsədilə sənaye və kənd təsərrüfatı sahələri üzrə 1 kilovat-saat elektrik enerjisinin tarifi - 0,6 qəpik (6%) artırılaraq 10 qəpikdən 10,6 qəpik həddində müəyyənləşdirilib.

Elektrikdoldurma məntəqələrinə verilən 1 kilovat-saat elektrik enerjisinin tarifləri 1,5 qəpik (13,6%) artırılaraq 11 qəpikdən 12,5 qəpik səviyyəsində təsdiq edilib. Elektrikdoldurma məntəqələri tərəfindən göstərilən xidmətin qiyməti isə sahibkarlar tərəfindən rəqabət şəraitində sərbəst olaraq müəyyənləşdiriləcək.

Elektrik enerjisi üzrə tariflərin müqayisəsi

№	Göstəricilər	Tariflər (qəpik / kVts, ƏDV ilə)
№	Göstəricilər	Əvvəlki	Yeni
1.	Elektrik enerjisinin təchizatı
1.1.	Əhali
1.1.1.	aylıq istehlak həcminin 200 kVts-a qədər (200 kVts daxil) olan hissəsi üçün	8,0	8,4
1.1.2.	aylıq istehlak həcminin 200 kVts-dan 300 kVts-a qədər (300 kVts daxil) olan hissəsi üçün	9,0	10,0
1.1.3.	aylıq istehlak həcminin 300 kVts-dan çox olan hissəsi üçün	13,0	15,0
1.2.	Qeyri-əhali
1.2.1.	ticarət və xidmət	11,0	-
1.2.2.	digərləri*	10,0	12,5
1.2.3.	sənaye və kənd təsərrüfatı	10,0	10,6
1.3.	Birbaşa 35 və 110 kV-luq xətlərlə həyata keçirilən, gün ərzində yük tələbatı stabil olan, istehsal məqsədləri üçün orta aylıq enerji istehlakı 5 milyon kVts-dan az olmayan alüminium sənayesi və ferrosilisium istehsalı sahəsi
1.3.1.	gündüz vaxtı (saat 08.00-dan 22.00-a qədər)	6,4	7,0
1.3.2.	gecə vaxtı (saat 22.00-dan 08.00-a qədər)	3,1	3,4

Qeyd:* Qeyri-əhali istehlakçıları üzrə struktur bölgüsü dəyişdirilib. Əvvəl "digərləri" qrupuna "Ticarət və xidmət"dən başqa bütün istehlakçılar daxil idi, yeni qərarda isə "digərləri" qrupuna "Sənaye və kənd təsərrüfatı"ndan başqa bütün istehlakçılar aiddir.

Kommunal xidmətlər üzrə tariflər

Elektrik enerjisi

Azərbaycan Respublikasının Tarif Şurası