Azərbaycanda milli parkda qonur ayı ovlanıb - YENİLƏNİB

Qonur ayını ovlayan brakonyerlərlə bağlı tədqiqat aparılır.

Ekologiya və Təbii Sərvətlər Nazirliyinin mətbuat xidmətindən Oxu.Az-a verilən məlumata görə, Şahdağ Milli Parkının İsmayıllı bölməsinin Basqal meşəbəyliyinin 4 saylı dolayında atəş səsləri eşidilib.

Dolayın mühafizə yegeri həmin istiqamətə yaxınlaşarkən altı nəfər tərəfindən qonur ayının ovlandığını müşahidə edib. 

Xidməti vəzifəsini yerinə yetirən mühafizə yegeri brakonyerləri saxlamağa çalışsa da, onlar qanuni tələblərə məhəl qoymayaraq ərazidən uzaqlaşıblar. Bu zaman yeger tərəfindən naməlum şəxslərin videogörüntüləri çəkilib.

Brakonyerlərin şəxsiyyətinin müəyyən edilərək məsuliyyətə cəlb olunmaları üçün İsmayıllı rayon Polis Şöbəsinə müraciət edilib və maddi sübut kimi video görüntülər polis şöbəsinə təqdim olunub.

Adı Azərbaycan Respublikasının “Qırmızı Kitabı”na daxil edilmiş Qonur ayını ovlayan şəxslərin kimliyinin müəyyənləşdirilməsi məqsədilə hazırda tədqiqat aparılır.

10:11

Azərbaycanda milli parkda naməlum şəxs qonur ayı ovlayıb.

Oxu.Az-ın məlumatına görə, noyabrın 19-da Şahdağ Milli Parkı, Basqal meşəliyində adı “Qırmızı kitab”a düşən qonur ayı naməlum şəraitdə ovlanıb.

Məsələ barədə Ekologiya və Təbii Sərvətlər Nazirliyi İsmayıllı Rayon Polis Şöbəsinə müraciət edib. Hələlik saxlanılan yoxdur.

Faktla bağlı İsmayıllı Rayon Polis Şöbəsində araşdırma aparılır.

İlhamə Əbülfət
www.oxu.az